Trumpip oqaasii sianiilliornertut republikanerit sinnerlugit senatorit ilaata oqaatigigaa
USA-p præsidenterisimasaata, Donald Trumpip, qinersisartunut arfininngornermi ataatsimiitsitsinermi oqaasii USA-mi politikerinit arlalinnit isornartorsiorneqarput.
Nunat assigiinngitsut nunat killiit illersoqatigiiffiannut NATO-mut akiligassaminnik akiliisimanngippata assersuutigalugu saassunneqassagaluarpata ikiorniarnagit, Trumpip qinersisartunut ataatsimiititsinermi ilaatigut oqaatigaa.
NATO-mi nunat naalakkersuinikkut siuttuisa ilaannik ataatsimeeqateqarsimanini Trumpip tassani oqaluttuaraa.
Nunat ilaata præsidentiata Trump aperisimavaa ikiorusussanerini naak NATO-mut akiligassartik akilersimanngikkaluarlugit.
Trumpilu ima akivoq:
- Naagga, illersorusunngilakkit. Saassussiumasullu qanorsuaq iliuuseqarnissaannik akerlianik kaammattorusuppakka. Akiliisariaqarputit, Trump oqarsimanerarpoq.
Trumpip nunat iligisat saassunneqarnissaannik kaammattuutai, USA-p maanna præsidentiata amiilaarnartutut silanngajaarnertullu taavai.
Trumpillu oqaasii republikanerini parteeqataasa ilaannit aamma isornartorsiorneqarput.
Trumpip oqaasii sianiilliornertut republikanerit sinnerlugit senatorit ilaata Rand Paulip oqaatigaa. Politikkimut tunngasunik nutaarsiassaqartitsivik Politico taama allaaserisaqarpoq.
