Danskit ministeriunerat, Mette Frederiksen arnanut spiralilersuinermi eqqugaasimasunut pisortatigoortumik utoqqatsissuteqarmat arnat arlallit katuamiittut qullitik allarterpaat.

- Kalaaliunersi pissutigalugu naapertuilluanngitsuliorfigineqarnersi pillugu utoqqatserpunga, Mette Frederiksen oqarpoq.

- Ilissinnit arsaarinnissutaasoq pillugu utoqqatserpunga. Aamma anniartitaanersi pillugu utoqqatserpunga.

- Piviusoq unaavoq Inuiaqatigiit ilissinnut illersuisussaagaluartut ajortumik pivaasi.

- Danmark sinnerlugu utoqqatserpunga.

Ministeriuneq meerartaarsinnaannginnerup qanoq alianartigineranik takorluuisinnaanngitsoq attortisimangaatsiarluni oqarpoq.

Ataatsimut oqaluttuarisaanermi pisimasut siunissarlu

Ministeriunerup nammineq piumassuserinngisaminnik naartunaveersaaserneqarnerat qanoq naapertuinngitsiginera oqaasertalerpaa.

- Oqaluttuarisaanerput ataatsimoorpoq. Ajunngitsut ajortullu. Pisimasut taarnerpaat ammaaffigisinnaanngikkutsigit naligiimmik pitsaasumillu immitsinnut attaveqarsinnaanavianngitsugut isumaqarpunga.

- Taamaammat ullumikkut utoqqatsissuteqarnerput pisimasunut kisimi tunngasuunngilaq.

- Maannakkut attaveqarnitsinnut ataatsimullu siunissatsinnut tunngassuteqarpoq.

- Aamma illugiissumik tatigeqatigiinnissatsinnut tunngavoq.

- Taamaammat ullumikkut Jens-Frederillu ataatsimut maaniippugut. Taamaammat imminut neriorsoqatigiinneruvoq.

- Tassa piffissami nutaami ataatsimut suliaqassasugut. Ataqqinnerusumik, naligiinnerusumik, ataqatigiinnerusumik ilaqarluni.

- Ilissi pillusi. Kinguaariit tulliuttut pillugit.

Isigisaminik matusisoq

Mette Frederiksenip oqaaseqartarfimmit Danmarkip isigisaminik matusisimanera nassuerutigaa, ‘taamaaliortoqarunnaarsimanerli’ aalajangersumik aamma oqaatigaa.

- Asasakka arnat. Asasakka ilaqutariit. Asasara Kalaallit Nunaat. Ullumikkut ilissinnut oqaasissara eqqortoq ataasiinnaavoq.

- Utoqqatserpunga.