Naalakkersuisut siulittaasuata Jens-Frederik Nielsenip (D) danskillu ministeriunerat Mette Frederiksen, Donald Trumpip nunarput pillugu immikkut aallartitamik toqqaasimanera ataatsimoorlutik qisuariaateqarfigaat.

USA-mi naalagaaffimmi Louisianami guvernøri Jeff Landry, Kalaallit Nunaannut immikkut aallartitassatut toqqarsimallugu, Amerikamiut præsidentiata inoqatinut attaveqaqatigiittarfiutimini Truth Socialimi ataasinngornermut unnuaani allappoq. 

Jeff Landry toqqarneqarnerminut inoqatinut attaveqaqatigiittarfimmi X-imi nammineerluni qujassuteqarpoq.

- Kalaallit Nunaat USA-mut ilaalersinniarlugu kajumissutsimik sulinissamut sullisissallutit ataqqinarpoq. Tamanna Louisianami guvernøritut inissisimanermut arlaannaatigulluunniit sunniuteqanngilaq, X-imut taanna allappoq.

Naalakkersuisooqatigiit siuttui taakku marluullutik Jens-Frederik Nielsen aamma Mette Frederiksen nunat allat naalagaaffimmut ilanngunneqaannarsinnaanngitsut oqaatigeqqippaat.

- Siornatigut erseqqilluinnartumik oqaatigereerparput. Maanna oqaqqissaagut. Nunat killeqarfiini naalagaaffiillu namminersortuuneri nunat assigiinngitsut akornanni pisinnaatitaaffiinut ikkutivinnikuuvoq. Tunngaviupput pingaarluinnartut. Nunat allat naalagaaffimmut ilanngutiinnarneqarsinnaanngillat. Aamma nunat allat akornanni sillimaniarnertut tunngavilersuinerugaluarpalluunniit. Kalaallit Nunaat kalaallit pigaat, USA-llu Kalaallit Nunaat tiguassanngilaa. Ataatsimullu killeqarfitta ataqqineqarnissaa naatsorsuutigaarput, ataatsimut oqaaseqarnerminni taama oqarput. 

Imaannaanngitsutut tusaaneqarsinnaasoq

Jens-Frederik Nielsenittaaq Facbookikkut unnuami pisoq pillugu allappoq. 

- Maanna ullaakkut itersimalerpugut Amerikap præsidentiata Nunarput pillugu immikkut aallartitaq toqqarsimaneranut atatillugu pilluta oqariartuuteqarsimasoq. Annertuutut isigineqarsinnaavoq. Kisianni uatsinnut tamanna allannguissanngilaq.

- Kalaallit Nunaat uagut pigaarput, killeqarfippullu ataqqineqassaaq. Nunat allat suleqatiginissaanut ammavugut aamma USA, taanna allappoq.

Donald Trumpip nunarput ukkatareqqimmagu ukioq ataasinngungajalerpoq, tassani præsidentitut ivertinneqanngilaarnermini oqaaseqarpoq:

- USA-mi isumannaallisaanermut nunarsuarmilu eqqissineqarnissaanut Kalaallit Nunaannik piginninneq aqutsinerlu pingaaruteqarluinnartuusoq USA misigivoq, Donald Trump Danmarkimi aallartitartaartoqarneranut atatillugu tusagassiuutinut nalunaarummi decembarip 23-annut unnuaani allappoq.

Tamanna Naalakkersuisuni siulittaasuusimasumut Múte B. Egedemut (IA) maanna Aningaasaqarnermut naalakkersuisuusumut qisuariartitsivoq.

- Kalaallit Nunaat inuiaat Kalaallit pigaat. Tuniniagaanngilagut aamma tuniniagaalernavianngilagut. Kiffaanngissuseq ukiorpassuarni sorsuutigisarput sapangissanngilarput, Facebookimini allappoq.