USA-p præsidentiata Donald Trumpip Louisianami guvernøri Jeff Landry USA-p Kalaallit Nunaannut immikkut aallartitaatut toqqarpaa.

Trump  nammineq inoqatinut attaveqaatimini, Truth Social-imi, taama sapaatip unnuaani allappoq.

Kalaallit Nunaat USA-p isumannaallisaaneranut qanoq pingaaruteqartigisoq Landryp nalunngikkaa, Trump allappoq.

- Louisianami guvernøritsialak Jeff Landry USA-p Kalaallit Nunaannut immikkut aallartitaatut toqqarlugu nuannaarlunga nalunaarutigissavara.

- Kalaallit Nunaat nunatta isumannaatsuuneranut qanoq pingaaruteqartigisoq Jeffip nalunngilaa, nunattalu soqutigisaanik siuarsaassaaq - suleqatitta silarsuarmiullu tamarmik isumannaatsumiilernissaat, toqqissisimanissaat aniguinissaallu pillugit, Donald Trump allappoq.

Republikanerip 54-inik ukiullip Jeff Landryp,  Louisianami 2024-mi januaarimili guvernøriusup, Trumpip toqqaanera qujamasuutigaa.

- Kalaallit Nunaat USA-mut ilaalersinniarlugu nammineq kajumissutsimik kiffartornera ataqqinaataavoq. Louisianami guvernøritut atorfinnut tamanna sunniuteqarnavianngilaq, taanna X-imut allappoq.

Ilungersunartoq

Landry politikkikkut atuuffeqanngikkallarami USA-mi sakkutuujusimavoq, politiiusimalluni suliffeqarfiuteqarsimallunilu. Louisianami guvernørip allaffiata nittartagaani taama allassimavoq.

Landry  naalagaaffimmi ukiut marluk matuma siorna guvernørinngortinneqannginnermini aamma USA-mi kongressimi ilaasortaavoq Louisianamilu inatsisinik atortitsinermut ministeriulluni.

Isumannaallisaanermut tunngasut pissutigalugit USA-p Kalaallit Nunaat tiguartariaqaraa, Donald Trump arlaleriarluni oqartarpoq.

Kalaallit Nunaat aqussinnaajumallugu sakkutuulersornissaq tunuarsimaarfigiumanagu aamma Trump oqartarpoq.

Taama oqaaseqarnera nunani tamalaani politikkikkut uivertitsipput, aamma USA-p Danmarkillu Kunngeqarfiata akornanni pissutsinik piffissap ilaani ilungersunartumik inissittoqarneranut pissutaaqataallutik.

Nunanut allanut naalakkersuisup Vivian Motzfeldtip (S) USA-p Danmarkimi aallartitaa Ken Howery decembarip ulluisa arfineq-pingajuanni ataatsimeeqatigaa.

Trumpip oqaasii Kalaallit Nunaanni toqqissisimannginnermik pilersitsisut, taamanikkut Motzfeldt oqarpoq.

- Soorunami pisut toqqissisimajunnaartitsillutillu eqqarsaatinik pilersitsipput. Taamaattumik tamakku ammasumik oqaloqatigiissutiginissaat pisariaqarluinnarpoq. Nunatta USA-llu qanimut suleqatigiinnerat naqissuserusuppara. Siunissami suleqatigiinnissamut attaveqaqatigiinnermullu aqqutissiuisoqarpoq, Sermitsiap aallaaserisaa naapertorlugu Vivian Motzfeldt oqarpoq.

Nutaarsiassaqartitsiviup Reutersip Trumpip Landrymik Kalaallit Nunaannut immikkut aallartitanngortitsinera pillugu præsidentip illorsuanit aamma Jeff Landrymit oqaaseqartitsinissaq sulissutigigaluarpaa, tamannali iluatsinngilaq.

/ritzau/