USA-p præsidentiata, Donald Trumpip NBC Newsimit apersorneqarnermini Kalaallit Nunaanni sakkutuulersornermik atuisinnaaneq aammaarluni mattutinngilaa.

Trump apersorneqarnermini Canadamut sakkutuulersornermik atuisinnaaneq periarfissatut atorsinnaaneraa pillugu aperineqaraluarpoq.

Amerikamiut præsidentiat Canadamut atatillugu "tamanna tikinneqanngisaannarumaartoq" isumaqarluni oqarpoq.

Kalaallit Nunaannulli tunngatillugu ima oqarluni:

- Taama pisoqarsinnaavoq. Kalaallit Nunaannut tunngatillugu pisoqarsinnaavoq. Unneqqarillunga oqassaanga – nunami nunallu tamalaat akornanni sillimaniarneq pillugu pisariaqartipparput. Kisianni tamanna ilimananngitsorujussuusoraara.

Kalaallit Nunaannik piserusunnera

USA Danmarkip USA-llu akornanni 1951-imi illersornissamut isumaqatigiissut pissutigalugu Kalaallit Nunaanni sakkutooqarnermi sinaakkuteqangaatsiareerpoq.

USA-p Kalaallit Nunaat tigorusukkaa aamma USA-p nunarsuarmi eqqissineq nunallu tamalaat sillimaniarnerannut atatillugu qeqertaq pisariaqartikkaa, præsidentip arlaleriarluni oqaatiginikuuaa.

USA-p Kalaallit Nunaat pisiarisinnaagaa Trumpip siunnersuutigereernikuuaa, tamannalu danskit kalaallillu naalakkersuisuinit sakkortuumik itigartitsissutigineqarnikuuvoq.

Danskit kunngiata Frederiup nunarput sapaatip akunnerata siuliani tikeraarpaa, tamannalu danskit kalaallillu erfalasuannik ilaqartumik kavaajaqarluni Nuummi kaffillertunukarneranik ilaatigut ilaqarpoq.