Nunami nutaanik naalakkersuisoqalermat qaammat ataasingajak qaangiuppoq. Piffissami pissanganangaartumi  qinersineq pivoq, tassami USA-p Kalaallit Nunaannik aqutsisariaqarneranik USA-p præsidentia Donald Trump arlaleriarluni oqartarmat. 

Trumpilli aqutsisuinut Naalakkersuisut attaveqarsimanersut Naalakkersuisut siulittaasuata Jens-Frederik Nielsenip (D) oqaatigiumanngilaa. 

 - Soorunami kikkut tamaasa naapinnissaannut piareersimavugut. Naalagaaffiulli inatsisitigut aaqqissuunneqarnera naapertorlugu naalagaaffeqatigiippugut. Taamaattumik nunanut allanut politikkimut atatillugu maannakkut pissutsit eqqarsaatigalugit qanimut suleqatigiippugut, Danmarkimi ministeriuneq Mette Frederiksen ataatsimeeqatiginiarlugu Danmarkimiinnermini sapaatiummat tusagassiortunik katersortitsinermi Jens-Frederik Nielsen oqarpoq. 

Amerikamiut aqutisuinut attaveqarsimanerluni aperineqarami ima akivoq: 

- Kingorna (qinersisoqareermalli) USA-mut tunngatillugu ilungersorpugut. Danmark suleqatigalugu tamanna isumagaarput.

 - Naalagaaffeqatigiinnerup iluani oqaloqatigiissimavugut. Amerikamiut præsidentiata allaffiani takusimanngilarsinga. Maanna taamaallaat taamatut oqarsinnaavunga, Jens-Frederik Nielsen Marienborgimi tusagassiortunik katersortitsinermi oqarpoq.

 Naalakkersuisut USA-mik suleqatiginnilluarnissaminnut piareersimasut aamma erseqqissarpaa, tamannali pissappat Amerikamiunit ataqqineqarnissaq pisariaqarnerarlugu. 

- Nukittuumik ineriartornarnerusumillu suleqatigiinnissamut piareersimavugut, ataqqineqarusuppugulli. Kimilluunniit pisiarineqarsinnaanngisaannassaagut, Jens-Frederik Nielsen oqarpoq. 

Mette Frederiksen Donald Trumpimik ataatsimeeqatiginninnissamik suliniuteqartoqarnersoq aperineqarami ima akivoq:

- Maannakkut nukivut naalagaaffeqatigiinnerup nutarternissaanut atorpavut.

- Amerikamiut oqaaseqaataannut tunngatillugu soorunami nunanit allanit suleqatitsinnit tamanit ataqqineqarnissarput naatsorsuutigigalutigu naalakkersuisutoqqat, naalakkersuisunngortut uangalu erseqqissumik oqarnikuuvugut.

- Ataatsimiinnerilli pilersaarusiornissaannut tunngaviusumik peqataasassanngilanga, Mette Frederiksen oqarpoq, amerikamiullu præsidentianik ataatsimeeqateqartuaannarsinnaanerminik nangilluni oqarluni. 

Donald Trumpip avannamut isigilernerata kingorna nunarsuaq tamakkerlugu tusagassiuutit Kalaallit Nunaat sammilersimavaat. Januaarip 20-ani præsidentinngortinneqarnermi kingorna USA-p Kalaallit Nunaat aqunnerusariaqaraluaraa arlaleriarluni oqarpoq.

- Kalaallit Nunaata pigilernissaa aqussinnaalernissaalu nunap isumannaatsuuneranut nunarsuarmilu kiffaanngissuseqarnermut pingaaruteqarluinnartoq USA isumaqarpoq, Donald Trump 2024-mi decembarimi, præsidentitut ivertinneqarnissani qaammat ataaseq sioqqullugu, tusagassiuutinut nalunaarummi allappoq.