Trumpip Gazamut pilersaarutaa præsidentiusimasut nersualaaraat
USA-mi præsidentiusimasut Joe Biden aamma Bill Clinton, Demokraatineersut, maannakkut præsidentiusoq Republikaneriusoq Donald Trump Gazamut eqqissinissamut pilersaaruteqarnera pillugu nersualaarpaat.
Tamanna inuit attaveqaqatigiittarfianni X-imi pisimavoq.
Siornatigut præsidentiusimasut taakkua marluk Trump assigiinngitsutigut isornartorsiortarsimagaluarpaat, isumaqatigiinniarnernili iliuuserisimasai nersorpaat.
Joe Bidenip “præsident Trump suleqataalu sakkuaattoqarunnaarnissamik isumaqatigiissummik nutarterinermi sulisimanerat pillugu nersualaarpai”.
Bill Clinton allappoq Trump taassumalu allaffissornikkut suleqatai „nersornaaserneqartariaqartut isumaqatigiittoqarnissaata tungaanut kikkut tamarmik peqataatilluarmagit“.
Sapaatit-akunnialui matuma siorna Donald Trump eqqissinissamut pilersaarut 20-nik immikkoortoqartoq saqqummiuppaa.
Tamatuma kinguninngua isumaqatigiinniartut Hamasimeersut, Israelimeersut USA-meersullu pilersaarut suliariniarlugu naapipput.
Sisamanngornerup oktobarip qulingiluaata unnuaani Israelip Hamasillu eqqissinissamut pilersaarut siulleq akuerivaat. Gazami sallunaveeqqutitut tigusaasimasut Israelimut utertinneqarnissaat Palæstinamiullu hundredellit Israelimiut parnaarussiviiniittut iperagaassasut ilaatigut isumaqatigiissutigineqarpoq.
Tamanna ataasinngornermi pivoq. Tassani sallunaveeqqutitut tigusarineqarnikut 20-t Israelimut angerlartinneqarput, Palæstinamiullu parnaarussat iperagaapput.
Pilersaarutip tullia aallartissinnaanngortoq
Maannakkut isumaqatigiinniarnerit tulliuttut ingerlanneqassapput.
- Maanna Israelip Hamasillu USA-mit, nunap ilaaniit nunarsuarmiunillu tapersersorneqarlutik, piffissaq erloqinartoq manna eqqissinermik ataavartumik, Palæstinamiunut Israelimiuninullu ataqqinnittumik toqqissisimasumillu, taarsiuttariaqarpaat,“ Bill Clinton allappoq.
Clinton, 1993-imiit 2001-imut præsidentiusimasoq, Trump siornatigut isornartorsiortarsimavaa ilaatigut Amerikamiut soqutigisaat pinnagit nammineq soqutigisani kisiisa eqqarsaatigalugit politikkernerartarsimallugu.
Joe Biden aamma allappoq Kangiani Qiterlermi „eqqissinermut ataavartussamut ingerlasoqarnera neriuutigalugu.“ Bidenip allaatamini pisuni nammineq peqataasimanini aamma tikkuuppaa.
Taanna 2021-mi januaarimiit 2025-mi januaari tikillugu, tassa oktobarip arfineq-aappaanni 2023-mi Hamasip Israelimik saassussinerata nalaani, Det Hvide Husimi præsidentiuvoq.
- Isumaqatigiissutip tamatuma angunissaa ajornaatsuunngilaq. Allaffissornikkut suleqatima sallunaveeqqutitut tigusat angerlartinniarlugit tamaviaaqalutik sulisimapput, palæstinamiunullu ikiueqqaarniutinik pajuttuisitsillutik sorsunnerlu unitsinniarsaralugu, Biden allappoq.
/Ritzau/
