Pasinartumik toqusoqarsimaneranut atatillugu politiit takunnissimasinnaasunik suli ujartuisut
40-nik ukiulik Dines Qeqe Tasiilami arfininngornermi ullaap tungaani toqungasoq siumorneqarpoq, tassungalu tunngatillugu Kalaallit Nunaanni Politiit takunnissimasinnaasunik suli ujartuipput.
Angutip 40-nik ukiullip aqqa assialu politiit arfininngornermi unnukkut saqqummiuppaat.
Tamatumunnga atatillugu politiit tusagassiuutinut nalunaarummi allapput angutip toqunnginnerani takunnissimasut politiiniit attavigineqarusuttut.
Takunnissimasinnaasunillu suli ujartuisoqartoq, Malik Sandgreen, Kalaallit Nunaanni Politiini ittutut tullersortaasoq ataasinngornermi ullaakkut oqarpoq.
- Suliaq misissoqqissaaleruttorparput. Inuiaqatigiinnit ikiorneqarusukkatta, angutip toqungasup kinaassusaa saqqummiuteqqaapallapparput. Toqunngitsiarnerani takunnissimasut tusarfigerusuppagut.
Nakorsaq toqusunik misissuisartoq Danmarkimeersoq
- Inuttaasunik angutip toqunnginnerani takunnissimasunik suli oqaloqatiginnikkusuppugut tusagaqarusullutalu, Malik Sandgreen politiini ittutut tullersortaasoq oqarpoq.
Paasiniaanermi ikiuuttussamik toqusunik misissuisartumik Danmarkimeersumik politiit aggersaasimasut aamma oqaatigaa. Toqusunik misissuisartup suna toqqutigineqarsimanersoq paasiniarnerani ikiuutissaaq.
Malik Sandgreen politiit misissuinerat apersuinerallu pissutigalugit annertunerusumik oqaaseqarsinnaanngilaq.
Angutip ilaqutai arfininngormat ilisimatinneqarsimasut, politiit tusagassiuutinut nalunaarummi allapput.
Pisumut atatillugu paasissutissanik peqaruit Kalaallit Nunaanni Politiit oqarasuaataannut 70 14 48-mut sianersinnaavutit.
