Royal Arctic Line siulittaasortaartoq
Royal Arctic Linemi ippassaq immikkut ittumik ataatsimiittoqarpoq.
Uanilu siulersuisunut siulittaasumik nutaamik toqqaaneq oqaluuserisassaniippoq, Inooraq Brandilu - siulersuisuni siulittaasuusimasoq toqqarneqarpoq. Sermitsiaq taama allaaserisaqarpoq.
Taassuma taamaalilluni siulittaasuusimasoq Pâviâraq Heilmann paarlappaa.
Namminersorlutik Oqartussaq pigisaanni immikkut ittumik ataatsimeersuartoqarnerani naalakkersuisut siulittaasuat, Jens-Frederik Nielsen (D) najuuppoq. Taannalu oqaaseqarnermini siulittaasunngortumut toqqaannartumik oqariartuuteqarpoq:
- Nunatta illoqarfiinut najukkanullu minnerusunut ajornanngitsumik patajaatsumillu assartuinissaq qulakkeernissaanut suliassarujussuaqarputit, Jens-Frederik Nielsen siulittaasunngortumik toqqaannartumik oqaaseqartoq, Sermitsiaq allappoq.
Inooraq Brandtillu akisussaaffigilikkani nammineq ima oqaaseqarfigaa:
- Nunami najugaqarfippassuaqartumi pilersuinerup kiffartuussinerullu qulakkeernissaa ajornakusoortuuvoq. Umiarsuaatileqatigiiffiup pilersuisussaatitaanera innuttaasunut pinngortitatsinnullu ataqqinninnikkut qulakkeerneqassaaq.
Inooraq Brandt RAL-imi siulersuisunut siulittaasunngornermi saniatigut Rambøll Grønland A/S-imi pisortaaneruvoq, Elite Sport Greenlandimi siulittaasup tulliuvoq, CSR Greenlandimi siulersuisunut tullersortaavoq, assiliinermillu suliffeqarfimmik Little Man Burningimik piginnittuulluni.
