Troels Lund sakkutuunut atortussanik pilertornerusumik tikiussititsiniarluni USA-mukartoq
Sakkussiat atortussallu danskit illersornissamut atugassaannut pisiarineqartartut sukkanerusumik pissarsiarineqassapput.
Tamanna illersornissamut ministerip Troels Lund Poulsenip (V) pingasunngornermi Washingtonimi tikeraarnermini qulequtarissavaa, tassanilu senatorit arlallit USA-llu sakkutuuisa imarsiortut ministeriat John Phelan ataatsimeeqatigissavai.
- Atortussanik tikiussititsinerup arriippallaarnera qularutissaanngilaq. Taamaattumik USA-mut angalavunga qanimut suleqatigiilluarnerput eqqartorniarlugu aammali Amerikamiut illersornissamut atortussanik tunisassiortut piffissami sivisuumi tikiussititsiniarnerisa unammillernartuunera erseqqissarniarlugu, Troels Lund Poulsen tusagassiuutinut nalunaarummi oqarpoq.
Illersornissamut ministerip ilaatigut timmisartut sorsuutit F-35-t sukkanerusumik tikiunneqarnissaat pillugu nunani tamalaani F-35-nut tunngasunik suliaqartut pisortaat oqaloqatigissavaa.
- Danmarkip USA illersornissamut atortussanut tunngatillugu qangali qanittumillu suleqatigisimavaa. Tamanna ingerlaannassaaq. Amerikamiut atortui teknologiiallu Illersornissaqarfiup suliassaannut pingaaruteqarput, Danmarkillu Nato-p ataatsimut pinaveersaartitsineranut illersornissaanullu peqataaneranut aalajangiisuullutik.
- Timmisartunik sorsuutinik F35-nik 16-inik nutaanik pissarsineq Illersornissaqarfiup akiuussinnaanissaanut annertuumik nukittorsaassaaq, Nato-llu ataatsimut pinaveersaartitsineranut illersornissaanullu pingaarutilimmik tapersiilluni, Troels Lund Poulsen oqarpoq.
Timmisartut sorsuutit F-35-t 16-it
Timmisartunik sorsuutinik F35-nik 16-inik pisinissaq Folketingimi illersornissaq pillugu isumaqatiginninniartartut oktobarip qulingani isumaqatigiissutigaat. Tamanna Issittoq Nunallu Avannarliit pillugit isumaqatigiissutip immikkoortuata aappaani pivoq.
Timmisartunik sorsuutinik F35-nik 16-inik nutaanik pissarsinissamut isumaqatigiissummi 29 milliardit koruunit immikkoortinneqarput, taamaalillunilu Danmarkip ataatsimut illersornissaqarfia timmisartunik sorsuutinik F35-nik 43-nik peqalissaaq.
Sakkussianik sukkanerusumik tikiussititsisarnermik kissaateqarneq pillugu ukioq manna siusinnerusukkut Troels Lund Poulsen nunanut allanut ministeri Lars Løkke Rasmussen (M) peqatigalugu USA-miippoq.
Ilaatigut amerikamiut raketinut atortussiaat Patriotit siuarsagaasut pineqarput, taakkumi Ukrainep Ruslandimut sorsunneranut sunniuteqarluarsimapput.
Danmark naggataagut Europami sanaartortunit sisamanit illersuutinik pisiinnarpoq.
/ritzau/
