Spiralilersuisimaneq pillugu suliami taarsiiviginninnissat siulliit 2026-mi pinissaat naatsorsuutaasoq
Spiralilersuineq pillugu suliami arnanut eqqugaasunut aningaasanik taarsiiviginninnissaq siulleq 2026-mi pissaaq.
Danmarkimi nunamut namminermut peqqissutsimullu ministeri Sophie Løhde, Peqqissutsimut Innarluutilinnullu naalakkersuisoq Anna Wangenheim peqatigalugu arnat eqqugaanikut arlallit, nunatsinni ippassaq ataatsimeeqatigereerlugit, taama oqarpoq.
- Arnat eqqugaanikut immikkut taarsiiffigineqarsinnaanissaannik inatsisitigut aaqqissuussamik pilersitsinissarput taakkulu aappaagu piareersimanissaanik arnat ilisimatinneqarnissaat pingaaruteqarpoq, Sophie Løhde tusagassiuutinut nalunaarummi oqarpoq.
Saammaasseqatigiinnissamut aningaasaateqarfimmiit taarsiiffigitinneq
Arnat eqqugaasimasut immikkut tamarmik aningaasatigut taarsiivigineqarniassammata, danskit naalakkersuisuisa saammaateqatigiinnissamik aningaasaateqarfik pilersinniarlugu sulissutigaat.
Taamatut aaqqissuussinerup 2026-mi ukiup affaata siulliup ingerlanerani atuutilernissaa naatsorsuutigineqarpoq, tamatumalu kingorna aningaasat tunniunneqartussat siulliit 2026-mi ukiup affaata aappaani tunniunneqarumaartut, tusagassiuutinut nalunaarummi allaqqavoq.
- Naalakkersuisoq Anna Wangenheim saammaasseqatigiinnermut aningaasaateqarfik pillugu oqaloqatigilluarpara, tassanilu qanoq ajunnginnerpaamik suleqatigiissinnaanerput ilaatigut eqqartorparput, Sophie Løhde oqarpoq.
Sophie Løhde Danmarkip nunattalu peqqinnissap tungaatigut suleqatigiinnerat aamma spiralilersuineq pillugu suliami arnanut eqqugaasunut taarsiissuteqarnissaq eqqartorniarlugit ulluni makkunani nunatsinniippoq.
Arnat naapinneri assut attortissutigigaa
Tamanna pillugu arnat arlallit ataasinngornermi naapippai, tamannalu danskit ministeriata assut attortissutigaa.
- Arnat inuusuttuarannguullutik akuersinikuunatik spiralilersorneqarsimanerat pillugu oqaluttuarfigineqarluni assut attortinnarpoq. Pisimasut allanngortissinnaanngilagut, ilinniutigisinnaavagulli, sumiginnaaneq arnat misigisimasaat qaquguluunniit peqqinnginniassammat, taanna oqarpoq.
Anna Wangenheim ataatsimiinnermut aamma peqataavoq, arnallu oqaluttuaminnik oqaluttuartut ataqqingaarlugit oqarpoq.
- Arnat ataatsimiinnermi peqataasut, misigisatillu pillugit sapiissuseqarlutik oqaluttuartut ataqqisorujussuuakka. Nukittusariaqarsimapput. Suliap kingunera pilertortumik peqqissaarussamillu ingerlanneqarnissaa misigisap matuma ersersippaa, tusagassiuutinut nalunaarummi oqarpoq.
