Isornartorsiuinerup kingorna: Avaaraq Olsen sakkutuut talittarfissaat pillugu peqataatitsinerusoqarnissaanik neriorsorneqartoq

Kommuneqarfik Sermersuumi borgmesteri Avaaraq Olsenimik (IA) apersuinermik sapaatip-akunnera kingulleq KNR-i saqqummiussivoq.

Tassani Issittumi Sakkutooqarfiup umiarsualivittaassamut allaffeqarfissamullu isumaqatiginninniarnermi Naalakkersuisunit peqataatinneqannginneq pillugu isornartorsiuivoq. 

Borgmesterip Naalakkersuisut siulittaasuat Jens-Frederik Nielsen (D) aamma Nunanut allanut Naalakkersuisoq Vivian Motzfeldt (S) maanna ataatsimeeqatigisimalerpai.

Taamak Avaaraq Olsen tusagassiutinut nalunaarummi allappoq. 

- Sulinerup ingerlariaqqinnissaanut suliallu ingerlanneqarnissaa ammasuussasoq Naalakkersuisunit uppernarsarneqarpoq. Suleqatigiinnerup aallartinnissaanut taamatut alloriarneq pingaaruteqarluinnarpoq, tassa innuttaasut peqatigalugit aalajangiisoqartassaaq – qulaaniillu aalajangiisoqartassanngilaq, Avaaraq Olsen allappoq.

Suliniut nangittoq

Tusagassiutinut nalunaarut naapertorlugu, Issittumi Sakkutooqarfimmut sakkutuut umiarsuaannut talittarfissamik pilersitsilersaarnermi suliniutip nanginneqarnera borgmesterip tapersersorpaa.

- Isumannaallisaaneq annertusarneqartariaqartoq paasilluarsinnaavarput, taamaattorli ungasinnerulersutut toqqissisimannginnermillu misigilersitsinata iliuuseqartariaqarpugut.

Tusagassiutinut nalunaarummi umiarsualivittaassap toqqissisimanerulersitsinissamik periuseqarluni qanoq suliarineqarsinnaanissaa pillugu paasissutissanik suli allaqqasoqanngilaq.

Taamaattorli sakkussiornermut ilisarnaatinngunnginnissaanut, sakkutuut umiarsuinut talittarfittaassaq qanoq pilersinneqassanersoq pillugu politikerit oqaloqatigiissimasut paasissutissiissutigineqarpoq.