Nuuk sapaatip akunnera una isiginnaartitsinernik, nipilersuutinik eqqumiitsulianillu ulikkaalersoq
Nuummi innuttaasut tikeraallu piorsarsimassutsikkut neqeroorutinut eqqumiitsuliortullu suliaannut nunanit tamalaaneersunit — annerusunut minnerusunullu — sapaatip-akunnera matumani peqataasinnaapput.
Suialaa Arts Festival 2025 sisamanngornermiit sapaammut ingerlanneqassaaq. Festivali siornatigut Nuuk Nordisk Kulturfestivalimik taaguuteqartoq, nunani avannarlerni Issittumilu eqqumiitsuliornermik piorsarsimassutsimillu nersuiniaaffiuvoq.
- Kalaallit Nunaat nunani avannarlerni Issittumut itsuarfiuvoq, festivalip nittartagaani allaqqavoq.
Piorsarsimassutsikkut nalliuttorsiorneq ulluni sisamani ingerlanneqassaaq, isiginnaartitsinerniit eqqumiitsulianik saqqummersitsinernut, workshoppertitsinernik oqalugiarnernillu imaqassalluni. Pisussat tamarmik illoqarfimmi sumiiffinnut assigiinngitsunut siammarneqassapput.
- Kalaallit Nunaanni illoqarfiit pingaarnersaat Nuuk, eqqumiitsuliornerup tungaatigut paarlaasseqatigiinnermi, suleqatigiinnissamut isumassarsioqatigiinnissamullu ammanerpaat, ataqatigiinnerpaat akuutitsinerpaallu ilaanniilissasoq, nalunaarummi allassimavoq.
Suialaa Arts Festivalsip nittartagaani inuillu attaveqaqatigiittarfiini quppernerini, ulluni pineqartuni pilersaarutit suuneri takuneqarsinnaapput.
Ilaatigut Nunatta Atuagaateqarfiani Kunngi Frederik taassumalu atuakkiai pillugit saqqummersitsineq, Kunngi, takuneqarsinnaavoq.
Qulleq qanoq ikinneqassanersoq tallimanngorpat ilinniarneqarsinnaavoq, Nuutoqqallu Katersugaasiviani Poesi Slam arfininngorpat ingerlanneqarpat taalliornermik atuffassinermillu unammisoqassaaq.
Aammattaaq nipilersortartut, qitittartut allallu Kalaallit Nunaanniit nunanillu allaneersunik tusarnaartitsisut ulluni taakkunani takuneqarsinnaassapput.
Festivali NAPA – Nunat Avannarliit Peqatigiiffiata Kommuneqarfik Sermersuullu suleqatigiinneratigut 2015-imi siullerpaamik ingerlanneqarpoq.
