Timmisartup Boeingip Indiami nakkarnerata kingorna Korea Kujalleq misissuiniarpoq

Korea Kujallermi ministereqarfiup timmisartortitseqatigiiffiit Boeinginik timmisartuutillit timmisartuisa orsussaqarfiinik misissuisarnissaat piumasaraa. 

Reuters taama allappoq.  

Korea Kujallermi nunamut, attaveqaasersuutinut angallannermullu ministereqarfik taama piumasaqarsimavoq. Ministereqarfiup timmisartut qaqugu misissorneqariissanersut suli nalunaarutiginngikkaa, nutaarsiassaqartitsivik allappoq.   

Juunimi timmisartup Boeing 787-8 Dreamliner-ip 242-nik ilaasoqarluni Indiami illunut najugaqarfiusunut nakkarnerata kingorna Korea Kujalleq taama nalunaaruteqarpoq.  

India qanittukkut aamma taamaaliorniartoq, timmisartullu Boeing-it orsussaqarfii misissorneqaqqullugit piumasaqarniartoq ataasinngornermi nalunaarutigineqartoq, Reuters allappoq.  

Juunimi timmisartoq Indiami nakkarmat ilaasut ilaat ataaseq aniguivoq.  

Timmisartup nakkannginnerani orsussaqarfia qamissimasoq, nalunaarusiami kingusinnerusukkut saqqummersumi erserpoq.  

Tamatuma kingunerisaanik sekundit pingasut missiliorlugit motoori orsussaqartinneqanngilaq. 

Ikeqqinneqarsimasut 

Qanorli ilillutik attaveqaatit qamissimanersut nalunaarusiami oqaatigineqanngilaq, taamaattumillu ajutoornermut kinaluunniit akisussaatinneqanngilaq.   

Attaveqaatit qaminnerisa kinguninngua timmisartoq qullarsarunnaarpoq apparsariartulerlunilu.   

Nalunaarusiaq Indiami timmisartut ajutoornerannik misissuisartunit saqqummersinneqartoq suli naammassineqanngilaq.   

Timmisartup aquttarfianit immiussaq naapertorlugu timmisartortartup aappaata aappani aperaa sooq orsussaqarfik qamissimaneraa. Tassanilu aappaata taamaaliorsimanani akivaa. 

Timmisartoq ajutoortoq misissorneqarmat orsussaqarfiit tamarmik ikumapput.  

Nalunaarusiaq naapertorlugu ajutoorneq sioqqutitsiarlugu timmisartup motooriisa tamarmik ikeqqinneqarsimanerinik takussutissaqarpoq.   

Timmisartoq juunip aqqaneq-aappaanni Indiap avannaata kitaani Ahmedabadimit Tuluit Nunaata illoqarfiisa pingaarnersaannut Londonimut ingerlaarniarluni tingeqqammertilluni illunut najugaqarfiusunut nakkarpoq, tamannalu qaartoorujussuarnermik malitseqarpoq.