Royal Greenland assammik arsarnermi nunanut allanut unammisartunut pingaarnertut aningaasaliisunngorpoq
Assammik arsarnermi nunanut allanut unammisartut piffissami aggersumi suliaqaqattaassapput. Tamanna saqqumilaartitsisussaavoq pingaarnertut aningaasaliisunngortup Royal Greenlandip qujamasuutigisaanik.
Arnat assammik arsarnermi arnat nunanut allanut unammisartut ulluni makkunani sungiusartut oktobarimi Parisiliassapput nunanut allanut unamminermi saniatigut iligiinnut franskinut sungiusaatigalugu unammissallutik.
Maligassiuisut
Unamminermi kiatit Royal Greenlandimik ilaatigut allannertaqartut decembarimi poortorneqassapput arnat nunanut allanut unammisartut VM-imut anngunniullutik Canadami unammissammata. Unamminermi tassani ajugaasut VM-imut anngutissapput nunarsuarmiut isiginnaaqataaffigisaannik unammersuarnerusumut.
- Soorunami nunanut allanut unammisartut aamma timersornermi qaffasissumi inissisimallutik maligassiuisut tapersersorusuppagut, Bodil Marie Damgaard, Sulisoqarnermut attaveqaqatigiinnermullu Royal Greenlandimi pisortaaneq oqarpoq.
- Kisianni aamma uagutsinnut pingaaruteqarpoq TAAK-ip assammik arsarneq tamarmi isiginiassagaa, aammalu timersuutip Kalaallit Nunaanni sumiiffinni assigiinngitsuni meeqqanut inuusuttunullu pilersittagai ataatsimoorfiit isiginiassallugit. Tamanna inuiaqatigiinnut ilaasuuffigisatsinnut utertitsissuteqarnissamik kissaateqarnerput pitsaasumik naapertuuppoq, Bodil Marie Damgaard oqarpoq.
Nunani tamalaani suleqatigiinneq
Assammik arsartartut nunanut allanut unammisartut kisiisa pinnagit suliniarneq ingerlavoq. Piukkunnaatilinnik inerisaasoqarpoq nukapissani niviarsissanilu nunanut allanut unammisartut nunat tamalaat unamminerini peqataasarlutik.
Nunarput, Island aamma Savalimmiut suleqatigiinnissamik isumaqatigiissuteqarput Nunatsinni assammik arsarnermik inerisaanermi isumalluarfigineqartumik.
- Royal Greenlandimik isumaqatigiissut Kalaallit Nunaanni assammik ineriartortitsinissamut, unammiffimmi aamma unammiffiup avataani tunngavissamik nukittuumik pilersitsivoq, TAAK-mi siulittaasoq Carsten Olsen oqarpoq.
- Royal Greenlandi pingaarutilimmik suleqatigilissavarput nunanut allanut unammisartutsinnut, kisiannili suleqatigiinneq aamma piukkunnaatilinnik ineriartortitsinissamut, inuusuttut assammik arsartarneranni kiisalu Kalaallit Nunaanni sumiiffinni assigiinngitsuni assammik arsarnermik pilersitseqataasartunut ataatsimoorfiit pitsaasumik sinaakkusersornissaannut aamma tunngalluni, Carsten Olsen oqarpoq.
Royal Greenland aamma Air Greenland assammik arsarnermi nunanut allanut unammisartunut maanna pingaarnertut aningaasaliisunngorput.
