Løkke erseqqissaasoq: USA-p Kalaallit Nunaanni sakkutooqarfiliorneq nammineq aningaasartutigissagaa

USA isumannaallisaanermut illersornissamullu isumaqatigiissut nutaaq tunngavigalugu Kalaallit Nunaanni sakkutooqarfinnik nutaanik pilersitsileruni, sakkutooqarfiliornissaq nammineq aningaasartuutigissavaa.

Tamanna Danmarkimi nunanut allanut ministerip Lars Løkke Rasmussenip (Moderaterne) Ritzauimut erseqqissarpaa.

- Amerikamiut Kalaallit Nunaanni sakkutooqarfiliornissaat Amerikamiunit soorunami aningaasalersorneqassaaq, nunanut allanut ministeri oqarpoq.

Lars Løkkeli aamma oqarpoq, isumaqatigiissummi "aningaasalersuinissamut" tunngassuteqartoqanngitsoq.

USA-p præsidentiata Donald Trumpip USA-p, Danmarkip Kalaallit Nunaallu isumaqatigiissuteqarumaarnerat tallimanngormat siullermik nalunaarutigigamiuk,  isumaqatigiissut aningaasartuuteqarfiunaviannginnerarpaa.

- USA-mut aningaasartuuteqarfiunavianngilaq, Trump Truth Socialimi "no cost" naqinnernik angisuunik allallugu allappoq.

Apeqqut: Qanoq ililluni taanna (Trump, aaqq.) oqarsinnaagami aningaasartuutaanavianngitsoq?

- Taanna aperisariaqarpat, Lars Løkke oqarpoq.

- Imaanngilarli nunap atorneanut akiliuteqartassasut, taanna nangilluni oqarpoq. 

Kalaallit Nunaat nakussassaraa

Løkkep USA-p Kalaallit Nunaanni sakkutooqarfissaanut nutaanut marlunnut "piumasaqaatit sukumiinerusut" suli isumaqatigiissutigineqannginnerat, tamatuma kingorna erseqqissaatigaa.

Avatangiisit aamma kalaallit inooriaasiat kulturiallu sakkutooqarfinni eqqarsaatigineqartariaqarput.

- Tamakkua pingaarutillit 1951-imi isumaqatigiissummut naleqqiullugit, Kalaallit Nunaannut nukittunerusumik inissisimatitsilerput.

USA, assersuutigalugu, Pituffimmi, ullumikkut USA-p Kalaallit Nunaanni sakkutooqarfigisatuaani, pitsanngorsaasoqassappat nammineq akiliissasoq, Lars Løkkep naqissuserpaa.

- Tamanna nalornissutigineqartariaqanngilaq, taanna oqarpoq. 

Pituffimmi sakkutooqarfik siornatigut Thule Air Base-tut siornatigut ilisimaneqarpoq, Amerikamiullu sakkutuui tassani 150-it missaanniipput.

Isumannaallisaanermut illersornissamullu isumaqatigiissummi nutaami allassimavoq, USA nunaqarfimmi Narsarsuarmi aamma Mestersvigimi sakkutooqarfiliorsinnaasoq.

Nunanut allanut ministereqarfiup allakkatigut akissummini uppernarsarpaa, nunat taakkua pingasut akornanni isumaqatigiissut nutaaq "aningaasaliinermut tunngassuteqanngitsoq“.

RITZAU