Arnat 100-nit amerlanerusut spiralilersuisimanermi taarsiivigineqartut amerlanerillu aamma taarsiivigineqassasut

Arnat spiralilersorneqarsimasut 100-nit amerlanerusut taarsiivigineqarsimalerput. Angalaqatigiillu arnat spiralilerneqarsimasut amerlanerit taarsiivigineqarnissamik qinnuteqarsinnaanerinut paasititsiartorlutik sapaatip akunnerata tulliani nunatsinnukassapput.

Allattoq Emil Weis

septembarip 25-at 2026 07:35

Nutserisoq Ivalu Thorleifsen, Paarnannguaq Nielsen

Arnat 1991 sioqqullugu piumasarinngisaminnik spiralilerneqarsimasut Depo-Proveramilluunniit naartunaveersaaserneqarsimasut taarsiivigineqartut amerligaluttuinnarput.

Arnat 122-t 300.000 koruuninik taarsiivigineqarsinnaatitaallutik paasisimavaat.

Patienterstatningen taarsiissutinik tunniussinissamut akisussaasoq KNR-imut pingasunngornermi taama paasissutissiivoq.

- Arnanut 100-nut taarsiissutinik tunniussisinnaanerput nuannaarutigeqaarput, Patienterstatningimi taarsiissutinik tunniussinissamut aqutsisoq Trine Berner Madsen oqarpoq.

Patienterstatningip suliat juulip aallaqqaataaniilli tigullugillu suliarisinnaalereerpai, naak inatsit aatsaat septembarimi isumaqatigiissutigineqaraluartoq.

Aamma atuarukArnat spiralilersorneqarsimasut siulliit taarsiivigineqartut

Qaammatip aallartilaarnerani qinnuteqartut 349-t Patienterstatningip tiguai. Massakkulli 572-uupput.

- Naatsorsuutigaarput, piffissap ingerlanerani qinnuteqartoqallattaaginnavinnissaa, Trine Berner Madsen oqarpoq:

- Soorunami ilaqarput qinnuteqarnissaminnut paasissutissanik sukumiinerusumik pissarsinissaminnut utaqqisut, ilaasa immaqa nalunngisatik qinnuteqarsimasut taarsiivigineqarsimasullu tusarsimassavaat.

Taarsiivigitinnissamut qinnuteqarfissaq septembarip aallaqqaataani 2028-imut killeqarpoq.

Arnat nuannaarlutillu oqiliallattut

Taarsiiffigitittoqarnissaanut aningaasat 300.000 koruunit tunniunneqassasut sapaatit akunneri tallimat matuma siorna aalajangiunneqarpoq.

- Taakku oqaloqatiginikuusavut aammalu taarsiivigitissimasut nuannaarlutillu oqiliallaqqapput, Trine Berner Madsen oqarpoq.

Taarsiivigineqarnissamut atatillugu kalaallisut oqaasilimmik sulisumik oqaloqateqarsinnaanissaq Patienterstatningip neqeroorutaani ilaavoq.

- Suleqateqarpugut Kalaallit Nunaanni peroriartorlutillu najugaqartunik, taannalu arnat kalaallisut oqalunnissaminnut toqqissisimanerusut oqaloqatiginissaanut ikiuuttarpoq, Trine Berner Madsen oqarpoq:

- Arlallit danskisut oqaloqatigisinnaavaatigut, kisiannili qanoq pisoqarsimaneranik oqaluttuarniaraangamik misigissutsitik kingunerluutillu atukkatik oqaluttuarinissaat ajornakusoortittarpaat.

Angalaqatigiit kikkuuppat?

Patienterstatningenimi immikkut siunnersorti Line Specht. Inatsisinut tunngasunik ilinniagaqalinnginnermini Sisimiuni peqqissaasutut sulinermini 2005-2006-imi najugaqarpoq.
Kalaaleq tarnip pissusianik ilisimasalik Tone Frank, Danmarkimi najugaqarpoq.
Eqqartuussisuusimasoq, Annette Hagdrup, suut tamarmik torersumik ingerlanissaanik qulakkeerinissaq pillugu peqataavoq.
Oqalutsi, Cecilie Uiloq Berthelsen.

Paasissutissarsiffik: Patienterstatningen

Allisiguk

Arnat arlaqarput Patienterstatningimut saaffiginnittut paaserusullugu aningaasat akiitsunut akiliutigineqannginnissaat qanoq pinaveersaartissinnaanerlugu.

- Taakkunani oqaloqatigisatsinni aningaasat qanoq isumannaatsumik paarinissaat initoorujussuuvoq. Imaapporli akiitsoqaraanni taava akiliisitsiniartartunut illersorneqartumik kontoliortoqarsinnaavoq, taava taakku 300.000 koruunit akiliisitsiniartartunut illersorneqarsinnaapput, Trine Berner Madsen oqarpoq.

Akiitsoqaraanni, taarsiivigineqarnissannullu pissutissaqarluarlutit paasigukku taava aningaaserivimmukarlutit akiliisitsiniartartunut illersorneqartumik kontolioriartorsinnaavutit. Tamatuma kingorna Peqqinnissamut ilageeqarnermullu ministereqarfik saaffigissavat taassuma aningaasat tunniunneqarnissaat isumagisussaammatigit.

Angalaqatigiit tikeraarnissaat

Angalaqatigiit Patienterstatningimeersut Ilulissanut septembarip 29-ianni angalassapput. Tamatuma kingorna Uummannamut, Aasiannut, Qeqertarsuarmut, Qasigiannguanut, Maniitsumut Nuummullu angalassallutik.

Angalanerminni arnat qinnuteqarnissaminnut qanoq iliorsinnaanerat saqqummiutissavaat.

- Danmarkimi kalaallit illuiniikkaangatta arnat arlallit qinnuteqannginnerminni aaqqissuunneqarnerata qanoq innera paasisaqarfigilluaqqaarusuttaraat maluginiarparput, Trine Berner Madsen oqarpoq.

- Taakkua kikkuunersugut oqaloqatigisinnaanerlutalu paaseqqaarusuttarpaat. Tamanna oqaluttuarnissaannut ajornannginnerulersitsisarpoq.

Angalaneq siulleq

Angalaqatigiit septembarip 29-anni Ilulissanukaqqaassapput, tassani AMS-ip atuarfiani ualikkut nalunaaqutaq tallimanut saqqummiisoqassaaq.
Tamatuma kingorna oktobarip pingajuanni sisamaanniluunniit Uummannamukassapput, timersortarfimmilu ullaap tungaani nalunaaqutaq qulinut saqqummiisoqassalluni.
Aasianni katersortarfimmi oktobarip arfineq-aappaanni ullaap tungaani nalunaaqutaq qulinut.
Qeqertarsuarmi katersortarfimmi oktobarip qulinganni ullaap tungaani nalunaaqutaq qulinut saqqummiisoqassaaq.
Qasigiannguani katersortarfimmi oktobarip 14-ianni ullaap tungaani nalunaaqutaq qulinut saqqummiisoqassaaq.
Maniitsumi katersortarfimmi oktobarip 17-ianni ullaap tungaani nalunaaqutaq qulinut saqqummiisoqassaaq.
Nuummi Katuami oktobarip 20-anni ullaap tungaani nalunaaqutaq qulinut saqqummiisoqassaaq.

Allisiguk

Angalaqatigiit angalareeriarpata qinnuteqartoqarnerunissaa Trine Berner Madsenip naatsorsuutigaa:

- Naatsorsuutigilluinnarparput Kalaallit Nunaanni angalalerutta arnarpassuit ikiorsinnaassallugit, ilimagilluinnarparpullu Kalaallit Nunaanni sulinerput tunuliaqutaralugu qinnuteqartoqarnerunissaa.

Angalanissaq tulliuttoq eqqaassanngikkaanni, angalaqatigiit Tunumut kitaanut kujataanullu upernaaru angalanissartik pilersaarutigaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.