Tasiilami aalisakkerivik nutaaq tunisiffigineqarsinnaalersoq

Tasiilami aalisakkerivik nutaarluinnaq ullumikkut ammaanersiorneqartussaagaluarpoq - tunisassiorfilli kinguaattooqqavoq sulilu naammassivinneqarnani. 

Taamaakkaluartorli nuannersumik tusarliussassaqartoqarpoq, tunisisinnaanermi ullumikkut aallartippoq tamannalu tunisassiorfimmi ingerlatsisup Frede Kilimep nuannaarutigivaa. 

- Illutaa napparpoq ilualu naammassikannerluni. Tamannalu isumaqarpoq  aalisakkanik tunisiffigineqarsinnaanissatsinnut akuerisaalluta, taanna oqarpoq. 

Naak tunisassiorfik suli naammassineqanngikkaluartoq, tunisassiorfimmi sulisut aalaakkaasumik suliaqalereerput, ullut kingulliit tunisassiorfiup tunisiffigineqarsinnaalernissaanut piareersaallutik.

-  Sikut kar-illu aalisartut atortagassaat, sulisunit arfinilinniit piareersarneqarput, Frede Kilime oqarpoq.

Qalerallit isumalluutigineqarluartut

Taanna oqarpoq, ulapaarfimmi sulisut arfineq-pingasuusassasut kiisalu Royal Greenlandimiit aalisartuniillu tunisassiorfiup atorneqalernissaa qilanaarutigineqartoq, tunisassiorfittaarneq pitsanngorsaataammat. 

- Siornatigut tunisisarneq ajunngikkaluarpoq, maannali isumaqarpunga ingerlalluarnerulissasoq aalisartullu ameranerulissasut. 

Saarulliit qalerallillu erlaveernikut 10 tonsit massakkorpiaq tunisassiorfimmut tunineqarsinnaapput, tunisassiorfimilu nutaami 500 tonsi qerisuutigineqarsinnaassaaq, tunisassiorfimmi ingerlatsisoq oqarpoq. 

Taassumap naatsorsuutigivaa, aalisartut qaammatini tulliuttuni tunisisarnissaat, qaleralinniartalernissarlu qilanaarutigivaa.

Tunisassiorfiup pisortatigoortumik qaqugu ammarneqarnissaa suli ullulerneqanngilaq.