Qooqqut festival ukiuni qulinngortorsiortoq: Nuannersuaarnissaajaasit ilimanarpoq

Aggustip qulingiluaani qulinganilu Katuaq qulissaat Qooqquni ataatsimoortitsissapput. Qooqqut festival ukiukkuutaartumik pisartoq nalleqqippoq. 

Qooqqut festival ukiumoortumik aaqqissuunneqaqqilerpoq. Pikkorissaanerit, nipilersuutinik tusarnaarnerit, sammisassallu assigiinngitsut pinngortitamik avatangiiseqarluni sapaatip akunnerata naanerani misigineqarsinnaapput.

- Ukioq manna ukiuni qulinngortorsiornerput nuannersarnermik nalliuttorsiutigineqassaaq. Festivalimik pilersitseqataasoq Nuka Alice Lund aamma takkutissaaq assigiinngitsunillu suliaqassalluni, Jakob Søvndahl Skovaa oqarpoq.

Nuka Alice Lund ilaatigut qilaatersussasoq, Jacob Søvndahl Skovaa-ip oqaatigaa.

Aaqqissuussami naleqartitat

Kulturip nukittorsarnissaa inuillu kulturimut ilisimasaannik siuarsaanissaq aaqqissuussinermi siunertarineqartoq, Katuami aaqqissuussanut pisortaq KNR-imut oqaluttuarpoq.

Issittumi nunanit eqqumiitsuliortut assigiinngitsut sammisaqartitsissapput. Mersortarfimmit Kittanit puisip amianik suliaqarnermut siullermeertumik pikkorissaasoqassaaq.

- Kulturitoqarput Katuamit soorunami pingaartikkatsigu inuit ilisimasaqarnerulernissaat, pisinnaasat kulturitsinnut tunngasut ingerlateqqinnissaat suliniutigiuartussaavarput. Jakob Søvndahl Skovaa oqarpoq, nangillunilu:

- Assersuutigalugu ammerisarneq kulturitsinnut pingaaruteqartorujussuuvoq, imaassinnaavoq inuit ilaasa soqutigisaraluaraat, iserfiginissaali nalornissutigalugu, misilittarnikuunngikkaannilu tamanna Qooqquni periarfissaavoq, neriuppugullu inuit Qooqquniit tamanna ingerlateqqittarumaaraat, Jakob Søvndahl Skovaa oqarpoq.

Aaqqissuussisut peqatigiiffinnik kulturikkullu suliaqartunik suleqateqarnissaa pingaaruteqartoq taassuma oqaatigaa. Eqqumiitsuliortummi assigiinngitsut kulturimik assigiinngitsumik festivalimi sapaatip akunnerata naanerani matumani ingerlateqqissiisinnaapput.

Sammisassat naatsumik

Arfininngornermi Qooqquni mersornermik puisip inalugaanik pikkorissaasoqassaaq. Timersorneq aamma aallutarineqassaaq, tassanilu issittormiut timersuutaannik sungiusartoqarsinnaalluni. 

Festivalertoqarnera pisarneq malillugu Nuka Alice Lundip qilaatersorluni tikilluaqqusineratigut ammaanersiorneqassaaq. Kingornalu tusarnaartitsivik ammassaaq nipilersornertalimmillu unnussiuaartoqassalluni. Naggaserlugu ikumaartitsisoqariarluni filmertoqassalluni.

Sapaammi ullaakkut aqqanerniik unnukkut qulingiluata tungaanut nipilersornermik, inngernermik, sanalunnermik, qajartornermik timersornermik qilaatersornermik uaajeernermik torlorsorneqrmik kalattoornermillu aliikkusersuisoqassaaq.

- Alaskaminngaannit, Nunavimmit, Nunavummit kiisalu saaminik, suleqatiginnippugut, taamaasilluta nunanit taakkunanit tikisitsinikuuvugut, Jakob Søvndahl Skovaa oqarpoq.