Naalakkersuisoq: Fabrikki nutaaq Tasiilami ineriartortitsissaaq

Tasiilami suliffiit nutaat arfineq-marluk pilersinneqangajalerput.

Aalisarnermut Piniarnermullu naalakkersusisoqarfiup pingasunngornermi tusagassiuutinut nalunaarutaani allassimavoq. Royal Greenland A/S-imi Tasiilami fabrikkiliortussanngortinneqarpoq, tassungalu taarsiullugu saarullinnik 5.515 tonsinik aamma suluppaakkanik 406 tonsinik pisassiissuteqarfigineqarluni.

Tamannalu aalisartut piniartullu peqatigiiffiata, Frede Kiliep nuannaarutigilluinnarpaa:

- Ukiorpassuarni taanna anguniagaq fabrikkitaarnissaq kiisami piviusunngulernera nuannaarutigaarput, taanna KNR-imut oqarpoq.

Ineriartortoqartoqartoq

Suliffeqarfik, Arctic Prime Fisheries maannamut Tunumi tunitsivimmi kisermaassisussaagaluarpoq. Taamaammat tunitsiviup ataasiinnaajunnaarnissaa Frede Kilimep aamma nuaannaarutigaa:

- Kisiartaagami unammillerteqannginnami aalisartunit akilersuinerup annikillinera peqqutigalugu  aalisartut nikallussutigisaramikkit, Frede Kilime oqarpoq.

Aalisarnermut Piniarnermullu naalakkersuisup, Karl Tobiassenip (S) Arctic Prime Fisheriesip Tunumi tunitsivimmik kisermaassinera naammanngitsoq isumaqatigaa:

- Tunu eqqarsaatigalugu inuussutissarsiornikkut aamma aalisarnikkut ineriartortitsisoqassappat naammanngilaq. Piffik annertoorujussuuvoq, aammalu piffiit imminnut ungasillutik. Taamaammat allamik nutaamik pilersitsisoqarnissaa aamma Naalakkersuinikkut siunniupparput, taanna KNR-imut oqarpoq, nangillunilu:

- Isumaqarpunga pingaaruteqarluinnaqqissaartoq Tunumi aamma ineriartornerup aalisarnerup tungaatigut aamma aallunneqarnerunissaa.

SIK-p immikkoortortaqarfiata siulittaasuata, Justine Kaliap nutaarsiassaq aamma qujarutigaa:

- Tusagaq kajuminnaqaaq isimaqarujussuarpoq ukua sulisussat arfineq-marluinnaagaluit kisiat soorunami iluaqutaarujussuassaaq, taanna oqarpoq.

Naalakkerusisut fabrikkip pilersinneqarnissaata tungaanut umiarsuarmik tunitsiviusinnaasumik pilersitsigallartoqarnissaa aamma kissaatigalugu paasissutissiissutigaat.