Politiit inuusuttunik seqqorsimasunik ujaarinnittut
Kalaallit Nunaanni Politiit seqqortoqarnera pillugu sisamanngornermi ullaakkut nalunaarfigineqarput. Inuusuttut pingasut Nuummi Inuk Hostelip eqqaani qeqertamit seqqortuupput.
Seqqornerit ilaat Nuup tungaanut seqqornerugunartut, pigaartut pisortaata, Carl Sværdip sisamanngornermi ullaap tungaani paasissutissiissutigaa.
- Illoqarfiup tungaanut ataaseriaq arlaleriarluunniit eqqortoqarsimanera ilumoorpoq, taamaammat inuit pingasut pasineqarnerat ilungersunarluinnarpoq, tamannami ulorianartorsiortitsineruvoq, Carl Sværd oqarpoq.
Inuit pingasut pineqartut 18-it 20-llu akornanni ukioqarput, pisumilu imigassartorsimasinnaapput, pigaartut pisortaat oqarpoq. Taakku umiatsiatsiaaraq alumiumiusoq atorlugu qeqertaaqqamukarsimapput Nuummullu uteqqissimallutik.
- Seqqoreernermi kingorna qimaanerminni qoorortooq qeqertamut qimassimavaat, inuilli pingasut nassaarinissaat iluatsinngilaq, pigaartut pisortaat oqarpoq.
Taamaammat pigaartut pisortaata innuttaasut ikiueqquai. Ullaap tungaani takusaqarsimagaanni inuilluunniit pingasut taakku maanna sumiinnerat ilisimagaanni politiit attavigineqassapput.
- Innuttaasut takusaqarsimappata tusarfigerusuppagut, qoorortuut aamma DNA-mik misissuiffiginissaat periarfissaavoq, Carl Sværd oqarpoq.
Kalaallit Nunaanni Politiit 70 14 48-mut sianerfigineqarsinnaapput.
Illoqarfiup qeqqani assersuineq
Politiit seqqortoqarneranik suliaqarnermi saniatigut Nuummi illoqarfiup qeqqani sumiiffimmik assersuipput.
- Tamanna oqaaseqarfigisinnaanngilara, Carl Sværd assersuisoqarnera pillugu aperineqarami oqarpoq.
Tamanna misissuiffigineqaleruttorpoq, taanna oqarpoq, KNR-illi pigaartut pisortaat allamik oqaaseqartissinnaanngilaa.
