Sulisitsisut: USA-p suleqatiginera inatsisitigut unioqqutitsinerunngitsoq
KNR-ip Air Greenlandip Amerikamiut Danmarkimi aallartitaqarfiata USA-p ukiuni 250-inngortorsiorneranut atatillugu nuannannissaannut aningaasaliisimanera sapaatip akunnerata aallartinnerani allaaseraa.
10.000 koruuninik aningaasaliisoqarpoq.
Sulisitsisuni pisortap Christian Keldsenip ilaasortat arlallit namminneq iluaqutissarsiniarlutik anguniagaqarsimasutut pasineqarnissartik ernumagigaat tusagassiorfimmut Finansimut oqaatigaa.
Oqaaseq ’nammineq iluaqutissarsiniarluni anguniagaqartoq’ isumaqarpoq inuit suliffeqarfiillu Sorsunnersuup Aappaani tyskinik nazistinik aningaasarsiutigalugu suleqateqartut.
Danmark tysinik nazistinik ukioq 1943 tikillugu suleqateqarpoq. Naak nunap kujammut sanilip suleqatiginissaa Danmarkimi pisortatigoortumik politikkiugaluartoq inuiaqatigiinni ileqqorissaarnikkut equngasoqalersimavoq.
Christian Keldsenip oqaatigaa naalakkersuisut pisortatigoortumik politikkiat tassaasoq USA-mut ullumikkut suleqateqarneq. Taamaattumik suliffeqarfiit suleqatigiinnerat inatsisitigut politikkikkulluunniit akornutissartaqanngilaq.
USA-mut suleqatigiinnermut politikki maannakkut allannguuteqarnissaa taassuma aamma ilimanarpallaannginnerarpaa.
- Tamanna pillugu ilaasortagut amerlasuut siunnersorpagut. Oqartariaqarpugulli Amerikamiut suleqatiginerat politikkikkut inatsisitigulluunniit unioqqutitsinerunngitsoq.
- .Issittumi periusissiap 2024-meersoq tunngavigaarput naalakkersuisullu akuttunngitsumik isumaqatiginiartarlutigit.
Isumaqatigiissuterujussuit
Christian Keldsen Sulisitsisuni pisortaanngikkallarami Air Greenlandimi sulisuuvoq.
Amerikamiunut isumaqatigiissuteqarnerit angisuut taamani ingerlatarisimallugit aamma oqaatigaa.
Christian Keldsen Kalaallit Nunaanni suliffeqarfiit aamma USA-p akornanni suleqatigiinnerit annertuut eqqarsaatigalugit suliffeqarfik suleqatigiikkunnaarnissamik kissaateqarpat suliffeqarfimmut ajornakusoortarnera oqaatigaa.
Kalaallit suliffeqarfiutaasa isumaqatigiissuteqarfigisaat angisuut ilaanni aningaasat millionilikkaat pineqarput ukiorpassuarnilu atuullutik.
Assersuutigalugu danskit Amerikamiullu illersornissamut suleqatigiinneranni takuneqarsinnaavoq.
- Kalaallit Nunaanniit Illersornissaqarfimmut pilersuiartarluta ileqqoraarput. Soorlu sakkutooqarfinnut sanasunik sanaartugassalerisunillu. Najukkami suliffeqarfiit atorneqarnissaat Amerikamiut politikkeraat.
Christian Keldsenip suliffeqarfiit ataasiakkaat qanoq suleqatiginnissinnaatiginerat aamma nalileruminaannerarpaa.
Suliffeqarfiit politikerillu USA-mik suleqatigiinneq unitsissappassuk inuiaqatigiinnut aningaasatigut annaasaqaataangaatsiassaaq.
Allatut isiginnilerneq
Pisortap USA-p suleqatigineqarneranut tunngatillugu inuiaqatigiit isumaqarfiginninnerisa allanngoriartornerat paasivaa.
- USA pillugu isiginnittaatsimi maanna allanngortoqalerpoq, tassami qanoq iliuuseqarnerat pissutigalugu ilaasa akeqqatut isigilerpaat.
Taava imaassinnaavoq suleqatigiinnissamut akornutaasinnaasunik malittarisassaqanngitsoq ilitsersuuteqanngitsorluunniit. Taamaakkaluartorli suliffeqarfiit ataasiakkaat periutsiminnik allanngortitsipput.
- Illuatungaa sakkukinnerusoq inatsisinik politikkimillu tunngaveqanngitsoq inuit suliffeqarfimmik isiginnittariaasaannut naliliinerannullu tunngavoq. Kalaallit Nunaanni attaveqaqatigiinneq pingaaruteqarluinnarmat suliffeqarfiit ilaat qanoriliornissaminnik eqqarsarluaqqaartarput.
- suliffeqarfeqarpoq Amerikamiunik suleqateqarusunngitsunik.
Sulisitsisuninngaanniit ilissi naalakkersuisut USA-p suleqatiginissaanut ilitsersuusiornissaat malitassiornissaalluunniit kissaatigaasiuk?
- Naamik. Naalakkersuisut suleqatigilluarpagut. Nersualaarneqartariaqarput. Pissutsini ilungersunarluinnartumiipput periarfissakikkaluarlutilli isumagisariaqarpaat.
- Soorunami pisortatigoortumik politikki najoqqutaraarput.
