Aasianni qimarnguiup illu attartugaa oqoqarmat matuneqarpoq

-Assut aamma atorneqartupilussuugatta una ukioq aallartimmalli, decembarilli 22-aniik juunip 8-nut, inoqaannavikkatta. 

Qarajap pisortaa Mina Schmidt, KNR-imut taama oqaluttuarpoq.

Qimanguik taanna, imminut pigisoq, Aasianni ukiut 40-ngajanni qimarnguiuvoq. Qarajaq Kommune Qeqertalimmit illumik attartorput, illuli oqoqalermat juunip arfineq pingajuanni ullormiik ullormut matuvoq. Qimarnguillu oqarnera naapertorlugu kommune aaqqiissutissamik tigussaasumik neqeroorsimanngilaq.

Taamaalilluni qimarnguik inunnik, soorlu angerlarsimaffimmi nakuuserfigineqarsimasunik, ikiuisinnaajunnaarallarpoq.

Qarajaq illumik allamik kommunimit attartornissaq siunertaralugu saaffiginnippoq, pisortalli oqarnera naapertorlugu Kommune Qeqertalik ikiuisinnaanngilaq. 

-Iliuuseqartoqartariaqarpoq. Aasianni innuttaasuusugut 3.000-it sinneqarpugut sineriammiillu ikiorneqarumasunit sianerfigineqartarluta. Itigartitsisariaqartarpugut naak illoqarfinnit allaniit nunaqarfinniillu ikiuisaraluarluta. 

Kommunili Mina Schmidtip nassuiaaneranut isumaqataanngillat. Aasianni Kommune Qeqertalimmi sullissivinni pisortaq Karl Villiam Jeremiassen allakkatigut KNR-imut akivoq: 

-Qarajaq suliffigineqarsinnaasunik soqanngimmat Kommune Qeqertalik utaqqiisaasumik aaqqiissutissarsivoq tassa ulluunerani kommunip peqatigiiffiinut ini atugassiaa neqeroorutigalugu, taamaattoqarnerani qimarnguiup ingerlanneqarneranut aaqqiissusiortoqarpoq. 

Kommunip utaqqiisaarutaanera erseqqissaassutigaa ingerlatsinikkullu suliassanut atugassiaanerarlugu. Najugaqarfittut atornagu. 

-Kommune Qeqertallip qimarnguiup ingerlaqqinnissaanut ikiorniarlugu piareersimasimavoq, ilaatigut attartornermut inilluunniit atornissaanut aningaasartuutaasinnaasunik. Tamanna suli neqeroorutigineqarpoq, Karl Villiam Jeremiassen allappoq. 

Matuneqariaannaanera

Qimarnguik inissarsinngikkuni matuneqariaannaanera Qarajap pisortaata ernumassutigaa. 

-Qimarnguik namminersortutut ingerlanera pissutigalugu nammineq inissarsiornissatsinnik piumaffigineqarpugut, Mina Schmidt oqarpoq.

Tassunga tunngatillugu kommune akivoq:

-Kommunip sukkulluunniit Qarajap ikiornissaanut itigartitsisimannginnini erseqqissaatigerusuppaa, sullissivinni pisortaq allappoq.

Taassuma oqarnera naapertorlugu kommunip qimarnguik aaqqiissummik ikiorniarlugu arlaleriarluni paasissutissiissutigisareersimavaa. 

-Attartornermi inilluunniit attartornerinut qaavatigut aningaasartuutaaratarsinnaasunik ilaatigut ikiorniartarsimavaa, sullissivinni pisortaq oqarpoq. 

Kommune taamatut ingerlasoqarnera tamaat aaqqiissutaagallartussanik suliniuteqartuarsimavoq aaqqiissutaasussanullu ikiuinissamut piareersimasarluni, Karl Villiam Jeremiassen allappoq.

Taannaannaanngilarli. Taassumami oqarnera naapertorlugu, qimarnguimmi sulisooreersut suliffimminnik arsaarneqarnissaminnik sioorasaarneqarput: 

-Inissamik nassaanngikkutta kommune namminneq qimarnguimmik pilersitsissallutik naatsorsuutigissanngikkippullu sulisorissagaatigut.

Kommune taamatut nassuiaanngilaq, sullissivinni pisortaq allappoq. 

-Kommune Qarajap ingerlanneqarnera akisussaaffigilerumallugu aalajangiinikuunngilaq. Qarajap ingerlaannarnissaa pisariaqartitsisullu qimarnguimmi sullinneqaannarnissaat kommunip aallaqqaataaniilli kissaatigaa, taanna allappoq. 

Qimarnguiup 2009-mili januaarimi illumut akiliisarunnaarsimanera erseqqissaatigaa, taassumalu kingorna Qarajap illup ingerlanneqarnera aserfallatsaaliorneralu akisussaaffigilerpaat. 

Aaqqiissutissamik piaartumik nassaartoqartariaqartoq

Qarajaq 18-init sinnerlugit ukiulinnit angerlarsimaffimmi persuttaanermik, sioorasaarneqarnermik allatulluunniit ajornartoornermik misigisaqarsimasunut qimarnguiuvoq.

Qimarnguik juunip arfineq pingajuanni matuneraniit massakkumut inuit saaffiginnittut aqqaneq marluusut Mina Schmidt oqaluttuarpoq. 

Illuuteqannginnamilli ikiuisinnaanerat killeqarsimavoq.

Qimarnguiup matuneqarnerani inisimasoqarmat ineqartut akunnittarfinnut inissittariaqarsimavaat.

-Ineqartugullu aamma taakku anisariaqarlutik pinikuupput. Kommunillu taakku inissinnagit uagut akunnittarfinnut inissippagut.

Qimarnguimmi Kommune Qeqertalimmut saaffiginnittaraluarnertik iluatsinngimmat Namminersorlutik Oqartussanut, Kommune Qeqertalimmi kommunalbestyrelsinut borgmesterimullu saaffiginnittariaqalersimapput.

Borgmesterimiit kommunalbestyrelsimiillu suli tusagaqarsimanatik pisortap oqaatigaa, Namminersorlutik Oqartussalli oqaloqatigisarsimavaat, Mina Schmidt paasissutissiivoq.

-Tallimanngormat namminersorlutik oqartussaniik allaffigitippugut tunngavilersuutit nassiutilaassagigut misissuinissaq aallartinniarlugu, Mina Schmidt oqarpoq.

Kommunip Qarajaq tamanit takuneqarsinnaasumik aaqqiagiinngissuteqarfigerusunngikkaa sullissivinni pisortap allakkatigut KNR-imut erseqqissaatigaa. Kommune erseqqissaarusuinnarpoq suliamullu tunngatillugu nassuiaateqarnissanilu Qarajamiillu isornartorsiuinerup akineqarnissaa anguniarlugu.