Sakkutooq piginnaatitaaffimminik unioqqutitsisoq: Illersornissamut ministeri tamanna pillugu maanna ajuusaartoq

Arktisk Kommandomiit sakkutuup piginnaatitaaffimminik unioqqutitsisimanera pillugu KNR-i maajimi allaaserisaqarpoq.

Sakkutuup Nuummi innuttaasunut marlunnut politiitut pissusilersorsimavoq. Angutip sakkutuutut atisallip biilinit nalinginnaasuniit innuttaasut sulerisuunerannik sumilu atorfeqarnerannik apeqquteqarfigai kinaassutsimullu uppernarsaatai takujumallugit. 

Naak uppernarsarneqarsinnaasumik ataasiaannarluni taamatut pisoqaraluartoq innuttaasup aappaa katillugit arfineq pingasoriarluni assigusunik iliorfigineqarsimanini KNR-imut taamani oqaatigaa.  

KNR-ip Arktisk Kommandomut saaffiginninnerata kingorna pisoq ajuusaarutigaat. Aalajangersakkallu atuuttut nunatsinnilu Illersornissaqarfiup sulisuisa piginnaatitaaffii erseqqissaatigalugit. 

Illersornissamut ministeri ajuusaartoq

Folketingimut ilaasortaq Naaja Nathanielsen (IA) illersornissamut ministerimut pisoq pillugu juunimi apeqquteqarpoq. 

- Kalaallit Nunaanni illersornissaqarfimmi sulisup piginnaatitaaffimminik innuttaasunut tunngatillugu unioqqutitsisimanera pillugu ministeri pisimasumut tassunga qanoq isumaqarpa? 

Illersornissamut ministerip Jeppe Bruusip (Socialdemokratiet) pisup siornatigut allaaserineqarsimasutut pisoqarsimanera akissuteqarnermini akuersaarpaa  

- Ajuusaarnartorujussuuvoq Kalaallit Nunaanni sakkutuut ilaata piginnaatitaaffini qaangerlugu innuttaasunik taamatut sulerineri pillugit apeqquteqarfigisinnaammagit kinaassusaannillu silaannarmi uppernarsaaqqusimammagit, illersornissamut ministeri Jeppe Bruus taama akivoq. 

Nutaanik suliniuteqartoqassanngitsoq

Naaja Nathanielsenip ministeri sunik aalajangersimasunik suliniuteqarnissaanik aamma apeqquteqarfigaa. 

- Taamatut pisoqaqqinnissaa pinaveersaartinniarlugu ingammik suliassat sakkutuunit misilittagakitsunit akisussaaffigineqaleraluttuinnarnerisa nalaanni ministeri sunik aalajangersimasunik suliniuteqassava?

Illersornissamut ministerip apeqqut toqqaannaq akinngilaa.

Arktisk Kommandop sakkutuut piviusumik taamaaliortussaatitaannginnerarpai Illersornissaqarfiullu sulisui Nuummi Kangerlussuarmilu sakkutooqarfiisa iluanni taamaallaat piginnaatitaaffeqarnerat taarsiullugu erseqqissaassutigalugu.

Innuttaasup KNR-imit ukiup aallartilaarnerani apersorneqartup angutinit sakkutuutut atisalinnit biilinit attartortakkanit ataasiarlunilu Sakkutuut politiivinit unitsinneqakulalluni taamani oqaatigaa. Pisulli KNR-imit Arktisk Kommandomiillu uppernarsarneqanngillat.   Assi © : KNR / Markus Valentin

Arktisk Kommandop siornatigut KNR-imut oqaatigisai malittarisassat atuuttut erseqqissarneqarsimaneri saniatigut oqaatigeqqippaa, 

- Sakkutuunut Kalaallit Nunaanni suliassamik akisussaaffilerneqartunut tamanna aamma erseqqissaassutigineqarpoq, illersornissamut ministeri Jeppe Bruus taama allappoq. 

- Upperilluinnarpara Illersornissamut sakkutuut Kalaallit Nunaanni innuttaasut eqqarsaatigalugit malittarisassallu atuuttut malillugit suliassaminnik aallussilluarumaartut. Ajuusaarnartumik kukkussuteqartoqarsimagaluartoq taamatut pisoqaqqinnginnissaa anguniarlugu Illersornissaqarfimmiit suliniuteqartoqarnera maluginiarpara. 

Naaja Nathanielsenip Arktisk Kommandop pisumut tunngatillugu qisuariapallassimaneranut Facebook aqqutigalugu qujassuteqarfigaa.

- Nuannaarutigeqaara Arktisk Kommandomiit qisuariapallattoqarnera. Illersornissaqarfik nunatsinni pingaarutilinnik suliaqarpoq tamannali inatsisit ataqqillugit, najugaqartut eqqarsaatigalugit tatiginnittumillu ingerlasoqartariaqarpoq.