USA-p, Kalaallit Nunaata Europallu akornanni atassuteqarnermi pisut naammareeruttortut, USA-p præsidentia Trump, USA-mut tunisat tamaasa, Europami nunat arlallit 10 procentimik akitsuusiiffigineqarnissaat pillugu kalerriivoq.

Akitsuusiineq februaarip aallaqqaataani atuutilissaaq, 25 procentimillu juunip aallaqqaataani ilaneqarluni, nunallu taakku sakkutuunik Kalaallit Nunaannukartitsisut eqqorneqarallassapput. Tamanna Danmarkimut, Norgemut, Sverigemut, Frankrigimut, Tysklandimut, Tuluit Nunaannut, Hollandimut Finlandimullu atuuppoq. 

Akitsuusersuinerilli nutaat nunatsinni suliffeqarfinnut aallaqqaataani eqquinavianngillat, Sulisitsisuni pisortaaneq Christian Keldsen oqarpoq.

Naatsorsueqqissaartarfik naapertorlugu, Kalaallit Nunaata USA-mut toqqaannartumik tunisai 2025-mi 0 koruunimiipput. Kalaallit Nunaanniilli USA-mut tunisat nunat allat aqqutigeqqaartarpaat, tassanilu tunisineq siorna 200 millionit koruunit missaanniipput, Christian Keldsen paasissutissiivoq. Nunalli allat taakku ilaannai USA-miit akitsuusiingaatsiarnissamut kalerriutigineqartumut eqqugaassapput. 

- Annikitsuarannguuppata – nioqquteqarfinnut allanut – taamaalioreersimanngikkaanni piumagaanni nuunneqarsinnaapput, taanna oqarpoq.

EU Kalaallit Nunaallu Ruslandip Ukrainemut iliuutsinut kinguneqartitsissuteqarneranni nunatta Ruslandimut ataatsimut tunisai 13-14 procentiusut Keldsenip innersuussutigaa. Avammut tunisat taakku sumiiffinnut allanut tunineqartarput.

Tamanna sioqqullugu coronap ilungersuatitsinerani aamma taama pisoqarpoq.

- Coronap ilungersuatitsinerata nalaani Kinap nioqqutissaatigut pisiariumanngilai, taamaammat Kinamut tunisatta ilarujussui nunanut allanut nuuttariaqarsimavagut, Christian Keldsen oqarpoq, nangillunilu:

- Taamaammat tamanna nunatsinni suliffissaqarnermi sunniuteqarnavianngilaq imaluunniit kinguariaataanaviarnani.

Nunatsinnut tapersersuineq akeqartoq

USA-lli akitsuusiiniarnini attatiinnassaguniuk nunatsinnit avammut nioqquteqarnerami akitsuutit qaffasinnerusut pingaartumik malugineqarsinnaassasut, Sulisitsisut pisortaata siulittuutigaa.

EU-mimi suliffeqarfiit nunatta USA-mut nioqquteqartarneranit nioqquteqarnerungaatsiartarput. EU-milu nunat USA-mut nioqquteqarnermi akitsuusiiffigineqassagunik Europami atuisartut akornanni pisissutaasinnaasut piffissami appassapput. Tamannalu nunatsinnit nioqqutinik, pingaartumik aalisakkanik raajanillu pisinikinnerulerneranik kinguneqarsinnaavoq.

- Tamanna uagutsinnut piffissap ilaani soorunami sunniuteqassaaq. Kisianni ajutuuinnissap killissaa qaquguussanersoq oqaatigisinnaanngilara, aamma neriuppunga arlaannit oqaatigineqarsinnaalissanngitsoq, Christian Keldsen KNR-imut oqarpoq.

Taamaammat Sulisitsisut tamanna nunanut allanut Trumpip nunatsinnik tiguaaniarluni aarlerisaarinera nunatsinnut tapersersuisunut akisusinnaalernissaa qularutiginngilaa.

- Tamanna iligisatsinnut, pingaartumik inuussutissarsiutaannut qanoq kinguneqarnissaa ilisimalluarparput.

- Ilungersunarnera ilisimalluarparput. Kalaallit Nunaannullu tapersersuineq akisuvoq. Takuarput aamma qujamasuutigaarput, Christian Keldsen oqarpoq.