Air Greenland USA-p ullorsiorneranut aningaasaliisoq
USA-p namminiilivinnerminik nalunaaruteqarnerata juunip 24-anni ukiuni 250-inngortorsiutigineqarneranut atatillugu Amerikamiut Danmarkimi aallartitaqarfiata politikerit nuimasut, inuussutissarsiornermik ingerlataqartut sakkutuullu nuannannissamut qaaqquai.
Nuannannersuaq ilaatigut Air Greenlandip tapiineratigut pisinnaasimavoq.
Tamanna Namminersorlutik Oqartussat suliffeqarfiutaata KNR-imut uppernarsarpaa.
- Air Greenlandip Amerikamiut Københavnimi aallartitaqarfiata malunnartitsineranut aningaasaliivoq, Air Greenlandip pisortaanera Jacob Nitter Sørensen allakkatigut oqaaseqarpoq.
Aamma Air Greenlandip Amerikamiut Københavnimi aallartitaqarfianut aningaasaliinera nutaajunnginnerarpaa:
- Air Greenlandimit ukiut arlallit ingerlaneranni inuussutissarsiornermut tunngatillugu suleqatigiiginnarnissarlu siunertaralugu tapiissutaavoq.
’Inuussutissarsiornermut ammasumut’ tapersiivoq
USA-p tunngavilerneqarneranit namminiilivinnermillu nalunaaruteqarnerup ukiuni 250-inngortorsiutigineqarnera Amerikamiut Danmarkimi aallartitaata Kenneth Howeryp Charlottenlundimi atorfillit inissiaanni pivoq.
Aallartitap oqarnera naapertorlugu inuit 1.000-it ullorsiornermi peqataapput. Piffissami Amerikamiut præsidentiata Donald Trumpip nunatsinnik tiguaanissaminik suli siorasaarinerani pivoq. Tamanna uani sapaatip akunnerani Nato-p Tyrkiami ataatsimeersuarnerani kingullermik siorasaarutigaa.
Air Greenlandip aningaasaliinermik oqallisigineqarsinnaanera paasilluarpaa:
- Aningaasaliinitta nunat assigiinngitsut akornanni politikkikkut inissisimanermut tunngatillugu oqallisigineqarsinnaanera paasilluarparput, Jacob Nitter Sørensen oqarpoq nangillunilu:
- Air Greenlandip nunatta pisiarineqarsinnaannginneranut pingaarnertut oqariartuutigineqarnera tapersersorpaa. Tamannali nunatta inuussutissarsiornissamut ammasuuneranut aamma attuumassutillit inuussutissarsiornermilu attaveqaatit aalajaatsumik silatusaartumillu suleqatigiinnarneqarnissaanut allanngortitsissanngilaq.
Amerikamiut aallartitaqarfia Danmarkimi suliffeqarfissuarnit aamma tapiissuteqarfigineqarpoq. Amerikamiut aallartitaqarfiata facebookikkut quppernerani videokkut Arla, Mærsk Carlsbergilu aningaasaliisuuneri takuneqarsinnaavoq.
Naalakkersuisunit akuersissutigineqanngitsoq
Amerikamiut Danmarkimi aallartitaqarfianut aningaasaliissuteqarneq naalakkersuisunit immikkut akuersissutigineqanngilaq, Jacob Nitter Sørensen oqarpoq:
- Aningaasaliineq Air Greenlandimi ingerlatsinermut inuussutissarsiornermullu tunngasumik aalajangiineruvoq, tamannalu naalakkersuisuniit immikkut akuerineqartussatut saqqummiunneqarani.
Timmisartuutileqatigiiffiup Amerikamiut aaqqissuussineri allat aningaasaliiffigineq ajorlugit ilanngullugu oqaatigaa:
- Air Greenland Amerikamiut aaqqissuussinerannut suliffeqarfiinulluunniit allanut aningaasaliineq ajorpoq.
Aallartitaqarfimmut 10.000 koruuninik aningaasaliisimanini Air Greenlandip oqaatigaa.
- Air Greenlandip Pituffik Space Basemi kiffartuussinissamut isumaqatigiissuteqarnera ilaatigut tunngaviuvoq, Jacob Nitter Sørensen taama oqarpoq.
