Inuit Innarluutillit tapersersorneqarnissaannut inatsit akuersissutigineqartoq: "Tusaavatsigit"
Inuit innarluutillit pisinnaatitaaffii nukittorsarneqassapput - partiit tamarmiullutik naalakkersuisut siunnersuutaannik tapersersuipput.
Peqqissutsimut inunnullu innarluutilinnut naalakkersuisoq Anna Wangenheim(D), inuit innarluutillit tapersersorneqarnerunissaat pillugu inatsisissatut siunnersuut inatsisartuni marlunngornermi akuersissutigineqareersorlu facebookikkut allaaserisami taama allappoq.
Inuit innarluutillit pitsaanerusumik sullinneqarnissaat inatsisissatut siunnersuummi ilaatigut siunnersuutigineqarpoq, tamannalu akuersissuteqartoqarneratigut qulakkeerniarneqarpoq, soorlu aamma meeraanermiit inersimasunngornermut ikaarsaariarnerup pitsaanerulernissaa qulakkeerniarneqartoq, innarluutilimmullu qanigisaasut ilaquttaminnik isumassuisinnaanissaannut periarfissat amerlasarneqarniartut.
Inatsisissatut siunnersuutip pingajussaanneerneqannginnerani Inatsisartut ilaqutariinnermut peqqissutsimullu ataatsimiititaliaanni arlaleriarluni suliarineqarpoq, siunnersuutillu taasissutigineqarnerani tamakkiisumik tapersersorneqarnera Anna Wangeheimip nuannaarutigaa.
- Qinigaaffimmi kingullermiilli inuit innarluutillit pillugit inatsisip nutarterneqarnissaa ilungersuutigisimaqaara. Taamaattumik inatsisip nutaap Inatsisartuni naammassillugu taasissutigineqarnera uannut immikkut pingaaruteqarpoq.
Anna Wangenheimip oqarnera naapertorlugu innarluutilimmut angajoqqaajusunik ukiut ingerlaneranni arlaleriarluni oqaloqateqartarsimavoq, pisariaqartitaminnik ilungersunartuutitaminnillu apuussisartut:
- Angajoqqaat kisimiittutut misigisimasorpassuupput. Kisimiinnginnassi naqissuserusuppara, tusaavatsigit.
Inatsit isornartorsiorneqarsimasoq
Naallu Wangenheim meeqqanik innarluutilinnut angajoqqaanik, Tiliumik, peqatigiiffinnik suliniaqatigiiffinnillu oqaloqateqartarsimagaluarluni inatsisissatut siunnersuut isornartorsiorneqangaatsiarsimavoq.
Inuillu innarluutillit oqaaseqartartuat Qivioq Løvstrøm isornartorsiuisunut ilaavoq, soorlu aamma Kommuneqarfik Sermersuup, Qeqqata Kommuniata, Avannaata Kommuniata Kommune Qeqertalimmilu borgmesterit aamma isornartorsiuisut.
Inatsit inuit innarluutillit atugaannut pitsaanerulersitsissappat aningaasaqarnikkut sulinermilu pisariaqartunik sinaakkuteqartariaqartoq taakku isumaqarput.
Inatsisissatut siunnersuutip pingajussaanneerneqannginnerani Qivioq Løvstrøm KNR-imut ilaatigut ima oqarpoq:
- Takuneqarsinnaanerusariaqarput kiap qanoq akisussaaffiginerai makku assigiinngitsut akiligassat aningaasaqarneq tungaatigut. Piviusorsiorpalaarnerusumik uagut kissaateqarnikuuvugut Tiliuminnganniit, taanna oqarpoq.
Soorlu siusinnerusukkut allaaserereeripput inatsisissatut siunnersuut inatsisartut ilaqutariinnut peqqissutsimullu ataatsimiititaliaanni suliarineqarpoq, kingullermik aappassaanneerneqannginnerani. Siunnersuutip pingajussaanneerneqannginnermini ataatsimiititaliami suliarineqarnissaa tassani aalajangerneqarluni.
Innarluutillit pillugit paasissutissanik pitsaanerusumik passussisoqarnissaa pillugu suleqatigiissitaliortoqarnissaa, siunnersuut ataatsimiititaliami suliarineqaqqereermat aalajangerneqarpoq, suliassaqarfimmimi aningaasatigut kingunissai pillugu ersarluttoqarmat.
Inatsisip nutaap tamanna pillugu qanimut malinnaavigineqarnissaa aalajangerneqarpoq.