Nivi Olsen: Siumup tatiginninnginnermik nalunaaruteqarneranit pasilliutigineqartut itigartitsissutigigai

Kulturimut, timersornermullu naalakkersuisup, Nivi Olsenip (D) KNQK-mut tapiissuteqarnissamut suliami pasilliutigineqartut tamaasa itigartitsissutigai.

Allattoq Markus Valentin

novembarip 09-at 2026 16:18

Kultureqarnermut timersornermullu naalakkersuisumut, Nivi Olsenimut (D) tatiginninnginnerit marluk sapaatip akunnerata siuliani nalunaarutigineqarput.

Taassuma tatiginnikkunnarnermik taasisoqarnissaa anigorpaa tunuartinneqaranilu.

Taassuma iliuutsini tusagassiuutinut ataasinngornermi nalunaaruteqarluni illersorpai.

Aamma atuarukPartiit marluk Nivi Olsenimut tatiginnikkunnaartut

Suliaq kattuffiup KNQK-p aningaasanik atugassanngortinneqartunik siunertanut allanut atuisimaneranut tunngassuteqarpoq.

Kattuffik aningaasanik pineqartunik nassuiaateqarnanilu suli utertitsinngitsoq 2026-mut aningaasaliiffigineqaqqippoq.

Nivi Olsenip suliap qanoq ingerlasimanera aamma Siumup inatsisit pingasut unioqqutinneqarsimaneragai sooq unioqqutinneqarsimanngissorinerlugit maanna oqaluttuaraa.

Inatsisit pingasut

Siumut ilinniartitaanermut, kultureqarnermut, timersornermut ilageeqarnermullu naalakkersuisumut, Nivi Olsenimut (D) tatiginnikkunnaarnissamik siunnersuuteqarpoq, inatsisit uku pingasut innersuussutigalugit:

§ 38. Aningaasanut inatsimmi aningaasaliissutissatut aalajangersakkat iluini Naalakkersuisut kulturikkut ingerlatsinermut sunngiffimmilu sammisassaqartitsinermut tapiissuteqassapput.
§ 40. Kulturikkut ingerlatsinissamut sunngiffimmilu sammisassaqartitsinissamut Naalakkersuisunit tapiissutisisut tapiissutit siunertamut atorneqarnerat uppernarsassavaat tamannalu pillugu piumasaqartoqarneratigut uppernarsaasissallugit
§ 41. Tapiissutisisimasoq eqqunngitsunik paasissutissiisimappat, tapiissutisinissamut piumasaqaatit naammassineqanngippata imaluunniit tapiissutit aningaasaliissutigineqartussanut siunertanut allanut atorneqarsimappata tapiissutit aningaasaliissutigineqarsimasut tamakkiisumik ilaannakuusumilluunniit utertillugit akilerneqarnissaat piumasarineqarsinnaavoq.

Allisiguk

Suliaq Nivi Olsenip oqarnera naapertorlugu

Inatsit siulleq aningaasaliissutit aningaasanut inatsisip iluani tunniunneqarsimaneranut tunngassuteqarpoq. Naalakkersuisup tassani unioqqutitsisoqarsimanngissoraa.

Inatsisip aappaa, Nivi Olsenimut pasilliutigineqartoq KNQK-p tapiissutinik siunertarineqartumut atuisimanermik uppernarsaasussaaneranut tunngassuteqarpoq.

Nivi Olsenip KNQK-p naatsorsuutini 2025-mi novembarip sisamaanni nassiussimagaa allappaa, naalakkersuisoqarfillu misissuinermini misissuinissamut pissutissiinerarlugu.

KNQK-p oqarnera naapertorlugu 2025-mit 535.342,22 koruuninik taarsiissuteqaqquneqarput.

Kattuffiup immikkoortut tulliuttut aningaasanik pineqartunik atuiffiusimasutut oqaatigai.

KNQK-p nalinginnaasumik ataatsimeersuarnera.
Tunumi pikkorissarnissamut peqataasussanik aallartitsineq.
Avannaata Qimussersuata tv-kkut toqqaannartumik aallakaatinneqarnissaanut atatillugu KNR TV-mi sulisup angalaneranut aningaasartuutit.
Ingerlatsinermut aningaasartuutit.
Avannaata Qimussersuata aaqqissuunneqarnerani aningaasartuutit ilaannik matussusiineq.
Ullormusiaqartitsineq kiisalu aningaasarsiaqartitsineq.

Kattuffik Avannaata Qimussersuata marsip 28-anni aaqqissuunneqarnissaanut 2026-mut tapiissuteqarfigineqarnissamik qinnuteqaateqaqqippoq.

Nivi Olsenilu marsip 20-anni tapiissuteqarnissamut akuersissuteqarluni.

Naalakkersuisulli tapiissuteqannginnermini Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap 2025-mi suliamik nutaamillu tapiissuteqarnissamut oqalliseqatiginiarlugu aggersarpaa.

- Tamanna tunngavigalugu ataatsimiinnerup kinguninngua aalajangerpunga 2026-mut aningaasanut inatsimmi tapiissutitut naatsorsuutigineqartut tunniunneqassasut. Taamaattorli qinnuteqaammi missingersuutit tunngavigalugit aningaasat siunertanut allanut tunngassuteqartutut nalilerneqartut ilanngaatigineqarput, Nivi Olsen allappoq.

Tapiissutinik nutaanik tunniussinermut atatillugu aningaasaqarnerup pitsaanerusumik aqunneqarnissaanut piumasaqaateqartoqarpoq. KNQK kukkunersiuisumik naalagaaffiup akuerisaanik imaluunniit kukkunersiuisumik nalunaarsorsimasumik ilaatigut atuissaaq.

Inatsit pingajuat kingullerlu pineqartoq aningaasanik eqqunngitsumik paasissutissiisoqarsimappat imaluunniit aningaasat siunertanut allanut atorneqarsimappata tamakkiisumik ilaannilluunniit taarsiinissamut tunngassuteqarpoq.

Nivi Olsenip imminut illersornermini naalakkersuisoqarfiup misissuinerani utertitsilluni akiliuteqarnissamut piumasaqaatip atuuttussaaneranut tunngavissamik nassaartoqarsimanera oqaatigaa.

- Tamanna tunngavigalugu kulturikkut sunngiffimmilu ingerlatsineq pillugu Inatsisartut inatsisaanni aalajangersakkat taaneqartut arlaat sorleq unioqqutissimaneriga takujuminaappoq, Nivi Olsen allappoq.

KNQK oqaaseqartoq

Naalakkersuisoqarfiup misissuinermini aningaasat ilaannik siunertanut allanut atuisoqarsimanera paasigamiuk utertitsilluni akiliuteqartoqarnissaa piumasarisimagaa, KNQK-p Facebookikkut quppernerminni allagaqarluni arfininngornermi uppernarsarpaa.

KNQK-p kukkunersiuisumik naalagaaffiup akuerisaanik aasaq atuilersimallutik allappaa.

- Tassa taannarpiaq aporfigisarsimasarput, kukkunersiuisut KNQK-tut angissusillit sullinnissaannit suliffeqarferujussuit kaaviiaartitarpassuallit tupinnanngitsumik orniginerusarmassuk, kattuffik allappoq.

- Siunissami Kattuffissorumaartussat neriunnaqaaq uatsinnit atukkatigut illersorneqarnerussasut.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.