Partiit marluk Nivi Olsenimut tatiginnikkunnaartut

Inatsisartuni ilaasortat Nunatta Karsiata 2025-mi aningaasaqarnermut naatsorsuutit oqallisigileruttoraat Naleraq naalakkersuisunut tatiginnikkunnaarluni nalunaaruteqarpoq.

Naleqqap kommuninut ataatsimoortumik akileraarutit 2016-imiit 2025-mut kukkusumik naatsorsorneqarsimanerat pillugu, naalakkersuisullu Kalaallit Nunaanni Qimussertartut Kattuffiannut 2026-mi tapiissuteqarnissamut akuerseriarlutik utertitsisimanerat, naalakkersuisunut tamanut tatiginnikkunnaarnermini tunngavilersuutigaat.

- Pisortat aningaasaataasa piffissaagallartillugu nakkutigineqarnissaat Naalakkersuisut ataatsimoorlutik akisussaaffigaat. Suliat taakku marluk tunngavigalugit Naleqqamiit Naalakkersuisut akisussaaffimminnik tamatuminnga isumaginninnerat tatigiunnaarparput, Naleqqap Inatsisartuni oqaaseqaataani allaqqavoq.

Naleraq naalakkersuisunut tamanut tatiginnikkunnaarluni nalunaaruteqareersorlu Inatsisartuni ataatsimiinneq unikaallatsinneqarpoq.

Naalakkersuisoqatigiinnit pinngitsoortinneqartoq

Tatiginnikkunnaarnerli naalakkersuisoqatigiinnit pinngitsoortinneqarpoq.

Naalakkersuisoqatigiit Demokraatit, Inuit Ataqatigiit, Atassut attaviitsorlu ataaseq aamma naalakkersuisoqatigiinnut ilaanngitsoq Siumut Naalakkersuisunut suli tatiginnillutik, ataatsimiinnerup unikaallatsinneqareernerani oqaatigaat.

- Taamaattumik siunnersuutigaarput Inatsisartut immikkoortoq 11 UKA/2026-p oqaluuserineqarnera nangissagaat, Pipaluk Olsen (D) naalakkersuisoqatigiit sinnerlugit oqaaseqarnermi oqarpoq.

Tamatuma kingorna Nunatta Karsiata 2025-mi aningaasaqarnermut naatsorsuutit pillugit oqallinnerat nanginneqarpoq.

Siumut Nivi Olsenimut aamma tatiginnikkunnaartoq

Tamatuma kinguninngua Siumut Ilinniartitaanermut, Kultureqarnermut, Timersornermut Ilageeqarnermullu naalakkersuisumut Nivi Olsenimut (D) tatiginnikkunnaarluni nalunaaruteqarpoq.

Nivi Olsenip kattuffimmut KNQK-mut 2025-mi tapiissutinik suliarinninnera pillugu naalakkersuisoqatigisimasaannit tatiginnikkunnaartoqarpoq.

Naalakkersuisup suliamik ingerlatsinera pisortallu aningaasaataannik akisussaassusilimmik aqutsisinnaanera pissutigalugu Siumut tatiginnikkunnaartoq Erik Jensen oqarpoq.

Nivi Olsenili isumaqataanngilaq.

- Takusinnaanngilara sukkut inatsisinik unioqqutitsisimallunga, Nivi Olsen Sermitsiaq naapertorlugu taama oqarpoq.

Siumut tatiginnikkunnaarluni nalunaaruteqareersorlu ataatsimiinneq aammaarluni unitsinneqarpoq.

Inatsisartut akunnerup aappaata affaa ataatsimiinneq unikaallaqqatinneqareersoq, Kristian Jeremiassen Inuit Ataqatigiinneersoq oqaluttarfimmi siulliuvoq.

Partiit naalakkersuisoqatigiit attaviitsorlu Kim Kielsen suli Nivi Olsenimut tatiginnittut taassuma oqaatigaa.

- Naalakkersuisumut suli tatiginnippugut, Kristian Jeremiassen oqarpoq.

Tatiginnikkunnaarnermik nalunaarut alla

Partii tulliulluni oqaluttarfimmiittoq tassaavoq Naleraq.

- Naalakkersuisup pissusilersuutaa akuerinngilluinnarparput, Jens Napãtôk' (N) oqaluttarfimmit oqarpoq.

Naleraq Nivi Olsenimut tatiginnikkunnaarnermik nutaamik nalunaaruteqartoq. Tatiginnikkunnaarnermi siullermi taassuma oqaaseqaataa pissutaasoq, inatsimmik unioqqutitsisimannginnerarmat, taassuma oqaatigaa

- Naalakkersuisumut tatiginnikkuunnaavippugut, Jens Napãtôk' oqarpoq.

Tatiginnikkunnaartoqarneranik nutaamik nalunaarteqartoqareersorlu ataatsimiinneq minutsinik qulinik unikaallatsinneqassasoq Inatsisartut siulittaasuata Kim Kielsenip oqaatigaa.

Pipaluk Olsen (D) ataatsimiinneq unikaallatsinneqareersoq Naleqqap tatiginnikkunnaarnermik nalunaarutaa pinngitsoortinniarlugu oqaluttarfimmiippoq:

- Suli tatiginnilluinnarpugut (Nivi Olsen aaqq.), naalakkersuisoqatigiit sinnerlugit Kim Kielsenilu taanna oqarpoq.

- Naatsorsuutigaarput naalakkersuisut malitseqartitsiumaartut, (2025-mut naatsorsuutit pillugit aaqq.).

Siumut naapertorlugu Nivi Olsenip paragraffini arlalinni inatsisinik unioqqutitsinera Naalakkersuisoqatigiinnit pimoorunneqanngitsoq Erik Jensen isumaqarpoq.

- Pisoq ilungersunarluinnartuuvoq, Erik Jensen inersuarmi pappialaatini tigullugit sakkortuumik ussersorluni oqarpoq.

Ataatsimiittarfimmi oqallinneq nanginneqarpoq, illuatungiliuttulli tatiginnikkunnaarnermik nalunaaruteqarnerat taperserneqanngilaq, naalakkersuisoqatigiit Kim Kielsenilu suli Nivi Olsenimut tatiginnimmata.

Taamaammat Nivi Olsen suli naalakkersuisuuvoq.