Politiit ullormut nalunaarutaat: Sapaatip akunnerata naanera ulapaarfiusoq
Angerlarsimaffimmi eqqissiviilliornerit qulinit amerlanerit, Qaanaami nakuusernerit marluk aamma imigassartorsimalluni biilerneq pillugu suliat pingasut.
Tamakkuupput Kalaallit Nunaanni Politiinit sapaatip akunnerata naanerani orniguffigineqartut.
Taakkunanilu suliat amerlanerit imigassartornermut attuumassuteqartut, Kalaallit Nunaanni Politiini sillimasut pisortaat Aputsiaq Hansen KNR-imut ilisimatitsivoq.
- Suliat arlallit orniguffigisagut soorlu angerlarsimaffimmi eqqissiviilliornerit, persuttaanerit aqqusinermilu eqqissiviilliornerit imigassartornermut attuumassuteqarput, sillimasut pisortaat Aputsiaq Hansen oqarpoq.
Imigassamik ajornartorsiuteqaraanni ikiortissarsiortoqarsinnaasoq
Angerlarsimaffimmi eqqissiviilliornerit arlallit ornigunnermi meerartaqartut naammattoorneqartartut ilanngullugu oqaatigaa.
Taamaammallu imigassamik ajornartorsiuteqaraanni ikiorneqarnissamik ujartuisoqarnissaa Kalaallit Nunaanni Politiinit kajumissaarutigineqarpoq.
- Meerartaqaraanni imigassartornissaq pisariaqanngilaq. Imigassamillu ajornartorsiuteqaraanni ikiortissarsiortoqarsinnaanera aamma periarfissaavoq, Aputsiaq Hansen oqarpoq.
Taakku saniatigut imigassartorsimalluni nakuusernerit marluk Qaanaami aamma orniguffigineqarput.
Taakkunani suliat aallartinneqarput kingusinnerusukkullu eqqartuussivimmi suliarineqarnissaat naatsorsuutigineqarluni.
Imigassartorsimatilluni biilernerit pingasut nalunaarutigineqartut
Imigassartorsimatilluni biilernerit aamma Politiinut ulapputaapput.
Narsami imigassartorsimallutik biilertut marluk unitsinneqarput. Uummannamilu UTV-ertoq ataaseq aamma unitsinneqarluni.
Narsami ulluni makkunani Aasivittoqarpoq taamaammat inuit allat inuunerannik navianartorsiortitsinissaq pinaveersaartinniarlugu akisussaaffimmik tiguseqataasarnissaq pisariaqartoq sillimasut pisortaata oqaatigaa:
- Imersimatilluni akisussaaffimmik tigusinissaq pingaaruteqartoq. Inuit allat imminullu ulorianartorsiortinnginnissaq pillugu, Kalaallit Nunaanni Politiit sillimasut pisortaat Aputsiaq Hansen oqarpoq.
