Kujataani Ittoqqortoormiinut tapersersuinermik takutitsiniartut

Ittoqqortoormeermiut Nunap Qeqqani uuliasiorniarnermut akerliussutsimik nuna tamakkerlugu takutitsisoqarnissaanik kissaateqarput.

Nutaarsiassaqartitsiviup Sermitsiap allaaserisaa naapertorlugu najukkami ataatsimiititaliami siulittaasup Hans Brønlundip nuna tamakkerlugu akerliussutsimik takutitsisoqarnissaanik kajumissaarivoq:

- Navianartorsiortutut tusaanngitsuusaarneqartutullu maanna misigivugut, ikiorneqarnissatsinnik tapersersorneqarnissatsinnillu qinnuigaatsigit, Hans Brønlund allappoq.

Taanna najukkami ataatsimiititaliami ilaasortaqatini peqatigalugit akerliussutsimik ataasinngorpat unnukkut arfineq-marlunut takutitsinissamik qinnuteqarput.

Takutitseqqusinerlu Kommune Kujallermi borgmesterip Malene Vahl Rasmussenip malinniarpaa. Borgmesterimi Nanortalimmi, Narsami Qaqortumilu akerliussutsimik takutitsinissamut peqataanissamik kaammattuuteqarpoq.

Nunatsinnik piginnittuujuarusunnermik takutitsinerussasoq, Malene Vahl Facebookkikkut videomi ilaatigut oqarpoq.

- Nuna tamakkerlugu tapersersorneqarusullutik saaffiginnipput. Taamaammat nangaanata Kommune Kujallerminngaanniit peqataassaagut,

Ittoqqortoormiini ilungersornerat paasisinnaagitsik Qaqortormiut arlallit KNR-imut aamma oqarput.

Kujataanut aamma eqquisinnaasoq

KNR-ip Knud-Jens Lennert Qaqortumi talittarfimmi orsussaarniarfiup eqqaani naapippaa.

- Soorunami soqutiginarpoq, Ittoqqortoormeermiullu paasisinnaavakka, taanna oqarpoq.

Assi © : Emil Weis / KNR

Pinngortitami piniarfiusartuni mingutsitsinissamut ernumasoqartoq paasisinnaalluarlugu taanna oqarpoq. Mingutsitsinerlu Ittoqqortoormiinuinnaanngitsoq eqquissasoq ernummatigalugu oqarpoq.

- Kujataamiut natsersuit ilitsoqqussarivagut. Uuliasiulerpata, natsersuit uuliasiorfigineqarniartoq aqqutigisarpaat. Taamaammat tassani akerliuvunga, Knud-Jens Lennert oqarpoq.

Pisinnaaguni akerliussutsimik takutitsinermut peqataanissani soqutigalugu nangilluni oqarpoq.

Amerikamiut isertinneqarusunngitsut

KNR-ip Qaqortormiut aamma allat akerliussutsimik takutitsinissamut tapersersuisut Ittoqqortoormiinilu ernumasunut paasinnillutik oqartut naapippai. Suliamulli annerusumik oqaaseqarnerunissaminnut naammattumik ilisimasaqartutut misiginatik arlallit aamma oqarput.

Aamma USA-p præsidentiata nunatsinnik aqutsilernissamik kissaateqarnerani, uuliasiorniartut amerikamiuunerat aamma oqaaseqarfigineqarpoq.

- Takutitsinerup siunertaanik tapersersorusuppara, taavalu kusanaatsorujussualiornertut isigaara. Aamma Amerikamiut nunatsinnut isertissanngilagut, Danmarkimeersoq Bentimik atilik ukiorpassuarnili Qaqortumi najugaqartoq oqarpoq.

- Kisianni akuersissummik tunniussisoqarsimappat, taava tunniusseriarluni itigartitsineq silaqanngitsuliornerussaaq, taanna oqarpoq.