Peqqinnissaqarfitta pituttorsimasuunanilu kikkunnit tamanit ornigassaammat tulluusimaarutigaarput.

Tamannali ilumoornerusinnaanngitsoq, ukiorpassuarni peqqissaasoq Berit Byg isumaqarpoq. Taanna Nuummi sinerissallu sinnerani assigiinngisitsinerup ilisimaarilerneqarnissaa pillugu politikerinut saaffiginnikkusuppoq oqallisissanillu pilersitsilluni.

Narsami peqqinissaqarfimmi peqqissaasutut kisiartaalluni ukiuni kingullerni marlunni atorfeqarpoq. Suleqateqarnini erseqqissaatigaa. Taakkuli naammanngilluinnarput.

Berit Byg Narsap Peqqinnissaqarfiani kisiartaalluni peqqissaasutut atorfeqarpoq, nakorsamillu atassuteqaateqanngilaq, taanna oqaluttuarpoq. Assi © : Privatfoto

Sulisut amerlassusissaat malillugit ikiortit tallimat, peqqissaasut sisamat nakorsarlu sulisuusussaagaluarput, taanna oqarpoq. Pivusorli tassaavoq Berit Byg nakorsatut ilinniarsimanngitsunik paarlatsinik arfinilinnik suleqateqarpoq.

- Peqqissaasutut uannut sumiginnaanerusoq isumaqarpunga, nakorsiartitannulli naapertuilluartuliornerunnginnera ajornerpaasoq isumaqarpunga.

- Inuit nappaalapput. Nakorsiartartuvut assigiinngitsorpassuarnik ajornartorsiutilerujussuusinnaasarput, aamma ilai peruluttorujussuusarput. Taakkua oqartussaasut ‘nakorsaqanngikkaluarunik ajornavianngillat, peqqissaasut ulapaarnerulaaraluarunik isumaminik’ taama oqaannarsinnaanerat kanngunartuliornerup killerpiaaniittoq isumaqarpunga, Berit Byg oqarpoq.

Piviusorli tassaavoq, suna tamaat ataqatigiisinniarlugu Berit Byg suleqatinilu arfinillit nakorsatut, peqqissaasutut ikiortitullu sulisariaqartarput.

- Ikiortit pigaartuuffissaat aamma suliffigisariaqartarpavut tamatumalu saniatigut nakorsaqartinnata suliassat allat isumagisariaqartarpavut, Berit Byg oqarpoq.

- Sulianut tunngatillugu pisinnaasakka ilisimaarilluarpakka killissakkalumi aamma, nakorsaanngilangami.

Qaammatini arfineq-marlunni nakorsaqanngitsoq

Tamannami akuerineqarsinnaanngilaq peqqissaasoq ittanneq taama isumaqarpoq.

- Nuummi nakorsaniit ikiorluarneqaqaagut, tamannami aaqqiissutissatut pitsaanerpaap tulliugunarpoq kisianni uannut peqqissaasutut nakorsiartunut passussinissannut nakkutiginninnera piumasaqaatitalerujussuuvoq, taanna oqarpoq.

Berit Bygip oqarasuaatikkut nakorsamik oqaloqateqarnerani nakorsap nakorsiaq ikiorserneqarsinnaaniassammat isiginngikkaluarlugu nakorsaatissaannik innersuussisarpoq.

- Peqqinnissaqarfimmi ilisimaarisamik assigiinngisitsinerusoq ajornartorsiuterujussuusorlu isumaqarluinnarpunga, taanna oqarpoq.

Nakorsaqartitsinissamut pilersaarut ukioq mannamoortoq piareerneqareeraluarpoq. Pilersaarulli taanna nakorsat ullaakkut arfineq-pingasuniit ualikkut sisamat tungaanut taamaallaat sulisarnissaannik qullersaqarfimmiit allannguinerisa kingorna ajalusoorpoq.

Akunnerni arfineq-pingasuni suliassaqarpallaarnera peqqutaalluni angumassinnaannginneq, Narsap Peqqissaaviani nakorsat atorfinikkusuttut piumajunnaarnerannik pissuteqarpoq.

- Narsap Peqqissaaviani qaammatini arfineq-marlunnik sivikinnerunngitsunik nakorsamit passunneqarsinnaanermik neqeroorsinnaaneq maanna periarfissaassanngitsoq, Berit Byg oqarpoq.

Napparsimasunik uteqattaartitsineq

KNR-imi oqallitsitsinermi siunnersuutigisani, tassa Nuup avataani nakorsanik 72-inik atorfinitsitsineq aaqqiissutaasinnaasoq, Naleqqameersoq Pele Broberg isumaqarpoq.

Siunnersuulli tamanna peqqissaasumut ittannermut isumallualersitsinngilaq.

- Siunnersuut ajunngikkaluaqisoq piviusorsiorpalaanngitsuusoraarali. Nunattami peqqinnissaqarfiini 72-inik ilinniarsimasunik sulinngerujoortunik nakorsaqanngilaq. Taamaattumik atugassarititat pitsaasut nunat avannarliit assigalugit nunatsinni peqannginnatta, avataaniit atorfinitsitsinissaq pinngitsoorneqarsinnaanngilaq, taanna oqarpoq.

Piviusorsiorpalaartumik iliuuseqarniartoqartariaqartoq isumaqarpoq.

Napparsimasut nakorsarneqarnissaannut ataqatigiissaarineq assersuutaasinnaavoq, taanna erseqqissaavoq.

Ullumikkummi nakorsiat Nuummut aallarlutik nakorsamit misissortikkiartortarput. Nakorsiartup nappaatigisorineqartoq nappaatiginngippagu suna napaatiginerlugu paastinneqarnani Narsamut angerlarteqqinneqartarpoq. Berit Bygilli nakorsiaq nappaatigisorisaanik allamik peqarpat Nuummut aallarteqqissinnaasarpaa.

Nakorsiap akissutisinissaata tungaanut taamatut pisaqartarpoq.

- Uteqattaartittarpavut tamannalu naleqqutinngilaq, taanna oqarpoq.

Narsap Peqqissaaviani ukiut 30-t sinnerlugit atorfigeriikkami suliffimi kingullersarissagaat takorloortarsimavaa. Suleriuserli taamaatsillugu qulakkeerlugu oqaatigisinnaavaa tamanna piviusunngornavianngitsoq.

- Taamaaginnassappat takorloorsinnaanngilara, taanna oqarpoq.