Piginneqatigiiffik ukiuni 19-ini tapiissutit nalinganik taarseeqqusilersaaraluartoq naalakkersuisoq ernumanngilaq

Kuannersuarni aatsitassanik piiaanissamik akuerineqanngikkuni aatsitassarsiortitseqatigiiffik 76 milliardit koruuninik taarseeqqusissaaq. Kalaallit Nunaat nammineerluni akiliisariaqalissasoq, naalakkersuisoq Naaja Nathanielsen naliliivoq.
2021-mi Energy Transition Minerals Kuannersuarni aatsitassanik qaqutigoortuniik piiaasinnaanermik misissuileruttortoq Inatsisartunut qinersinissaq suaarutigineqarpoq. Aatsitassanik qaqutigoortunik elektronikkinut atorneqartartunik piiaaniarneq ajornartorsiutitaqarpoq, piiagassami uranimik akoqarput.   Assi © : Scanpix
Allattoq Christine Hyldal
juulip 21-at 2023 13:37
Nutserisoq Alice Sørensen

76 milliardit koruunit. 

Danmarkip nunatsinnut tapiissutigisartagaasa 19-eriaataat, tassa aatsitassarsiortitseqatigiiffiup Energy Transition Mineralsip nunatsinni aatsitassarsioqqusaanngikkuni nunatsinnit Danmarkimiillu taarseeqqussutaat kisissaanngingajattut. 

Kuannersuit uani pineqarput, aatsitassarsiortitseqatigiiffiummi Kuannersuarni aatsitassarsioqqusaannginnini naammaginnginnamiuk akuerineqarnissi anguniarlugu isumaqatigiissaasarfimmi aalajangiititserusuppoq. 

Suliarli Danmarkimi isumaqatigiissaasarfimmi suliarineqassanersoq nalunarpoq. 

Aatsitassarsiortitseqatigiiffik naammagittaalliummik allagaqarpoq, taannalu Namminersorlutik Oqartussat danskillu naalakkersuisuisa januaarip afineq-pingajuat tikitsinnaagu akissavaaat. Tamatumalu kingorna suliap isumaqatigiissaasartunut ingerlateqqinneqarnissaa aatsaat naliliivigineqassaaq. 

Ernumanngilaq

Taamaattorli Aatsitassarsiornermut naalakkersuisoq Naaja Nathanielsen IA-meersoq annilaangassutissaqannginnerarpoq. 

- Suliaq isumaqatigiissitsiniartarnermi eqqartuussivimmut suliassanngortinneqarsinnaanngitsoq, Naalakkersuisut isumaqarluinnarput, tusagassiutinut nalunaarummi taanna allappoq.

- isumaqatigiissitsiniarnermi eqqartuussiviup suliami aalajangiinissami piginnaatinneqannginneranik isumaqarnerput allamnngortinngilarput.

Allattut oqaatigalugu suliap isumaqatigiissaasartunut anngunnissaa Naaja Nathanielsenip aarleriginngilaa.

Suliarli australiamiut aatsitassarsiorfiannut 76 milliardit koruuninik taarsiinermik inerneqassappat kikkut akiliissappat?

Kalaallit Nunaata akilerumaarai, naalakkersuisoq naliliivoq

- Aatsitassanut immikkoortup tiguneqareernera pissutigalugu, Kalaallit Nunaanni Namminersorlutik Oqartussat kisimik taarsiisussaatitaanissaat pissusissamisuussaaq.

- Namminersorlutik Oqartussat qallunaallu naalagaaffiata suliami akuunnginnera piffissaq tamaat isumaqatigiissutigiuarpaat.

Taaarsiinissarli ilumut killifigineqarumaarnersoq, taanna naliliinngilaq.

- Uranimik inatsit malillugu aalajangernerit kingunerannik taarsiivigeqqunerit akuerineqarsinnaasariaqanngillat, Naaja Nathanielsen oqarpoq.

Piginneqatigiiffiup ajugaanissaa ilimaginngilluinnarpaa

Naaja Nathanielsenip parteeqataata avatangiisinut tunngasuni oqaaseqartartup Marianne Paviasenip oqasii assingupput.

- Tassami aningaasarparparparujussuupput aamma minnerpaamilluunniit takorloorsinnaanngilara ajugaanissamik periarfissaqartut, pissutigalugu aatsitassarsiorniat maani nunatsinni kikkulluunniit periarfissamik atuisarput taavalu nalunngilaat aallaqqaataaniilli itigartinneqarsinnaallutik. Neriorsorneqarneq ajorput aallaqqaataaniilli aallartinnissamik.

Marianne Paviassen KNR-imut taama oqarpoq.

Illua tungiliuttut aarleripput, Atassutip siulittaasua Aqqalu C. Jeremiassen nunatta milliardilikkaanik akiligassinneqarnissaanik ernumavoq.

- Uggornarujussuarpoq inuiaqatigiinnut eqqornerluissappat.

- Avillugu akilertariaqassooq tassa, nunarput naalagaaffillu.Taava kisianni tassanngaanniik innuttaasut pinngitsooratik eqqugaasussaassapput akilersorneqalissappat taama aningaasat annertutigisut.

Energy Transition Minerals Kuannersuarni aatsitassanik qaqutigoortuniik piiaasinnaanermik misissuileruttortoq Inatsisartunut qinersinissaq 2021-mi suaarutigineqarpoq.

Aatsitassanik qaqutigoortunik elektronikkinut atorneqartartunik piiaaniarneq ajornartorsiutitaqarpoq, piiagassammi uranimik akoqarput.  

Qineqqusaarnermilu uranimut akerliuneq sammineqaqaaq.

Isumaqatigiissaaniartartunut suliassanngortitsineq suua?

Eqqartuussivilersuinermut taarsiullugu isumaqatigiissaaniartartunut suliassanngortitsisoqarsinnaasarpoq, isumaqatigiissaaniartartulli isumaqatigiinngissutaasunik eqqartuussivitttulli aaqqiagiissitsiniartarput. Isumaqatigiissitsiniartartunut suliassanngortitsineq isumaqatigiinnissamut kiffaanngissuseqarfiusarpoq, taammaammat illua tungeriik suliamik namminneq inerniliisinnaasarput. Eqqartuussivinni taamaaliorsinnaasanngillat. 

Isumaqatigiissaaniartartut eqqartuussivinnut naleqqiukkaanni illua tungeriik suliap inerneranut sunniuteqarnerusarput. Eqqartuussivilersuinermimi naapertoqqissaagassanik najoqqutaqarlunilu malitassaqartarpoq. Taakkualu naapertoqqissaarlugit suliaq suliarissanerlugu illua tungeriik namminneq aalajangersinnaavaat. Illua tungeriik naligiinnissaat isumaqatigiissianiarnermi tunngaviulluinnarpoq. Tassa illua tungeriit assigiimmik pineqassapput, aamma suliami tunngavilersuinissamut assigiimmik periarfissaqassapput. 

Najoqqutaq: legaldesk.dk

Inuit Ataqatigiit qinersinermi ajugaarujussuarput, siulittaasorlu Múte B. Egede oqarpoq, Inuit Ataqatigiinnik taasineq Kuannersuarni suliniummut akerliunermik taasinerusoq.

Qinersinermit qaammatit arfineq-pingasut qaangiummata, decembarimi 2021-mi uran pillugu inatsit atuutilerpoq.

Inatsillu Energy Transition Mineralsimut akorngutinngorpoq suliniutaammi ingerlaqqisinnaajunaarpoq.

Energy Transition Mineralsili isumaqarpoq aatsitassarsiorniarnermik suliani akuerineqarsinnaasoq, taamaammallu maanna Købehavnimi isumaqatigiissaasartunut nalilersuisitsinialerpoq.