Peqquserlunneq pillugu suliami ilisimannittut nutaat arlallit nassuiaateqartinneqartut

Naalakkersuisut siulittaasorisimasaannut, Lars-Emil Johansenimut kommunimilu pisortaanerusimasumut Lars Møller-Sørensenimut tunngatillugu peqquserluttuliorneq pillugu eqqartuussivimmi suliaq ippassaani aallartippoq, illuatungeriillu ullumi Nunatta Eqqartuussisuuneqarfianeeqqipput.

Lars-Emil Johansen Lars Møller-Sørensenimit siunnersortitut atorfinitsinneqarnermini ukiut marluk ingerlanerini 730.000 koruuninik akissarsissutigisinnaasaminik siunnersortitut ilumut suliaqarsimanersoq suliami qitiuvoq.

Lars-Emil Johansenip oqarnera naapertorlugu isumaqatigiissummi – suliassat aalajangersimasuunngillat, siammasinnerullutillu, tamanna Lars Møller-Sørensenip ippassaq aamma nassuiaatigaa.

- Siunnersortitut isumaqatigiissut siammasippoq, nalinginnaasumillu siunnersuinerulluni, Lars-Emil Johansen eqqartuussivimmi marlunngornermi ullaakkut nassuiaavoq, taannalu suli pinngitsuunerarpoq.

Lars-Emil Johansenip siunnersortitut isumaqatigiissut Nuummi inissiaqarfissamut Siorarsiorfimmut tunngatillugu suliniutinut assigiinngitsunut aningaasaliisussanut pilerisaarinissamut, Tasiilami Kofoeds Skolemik pilersitsinissamut siunnersuinermik politikikkullu suliaqarnermi nalinginnaasumik ikiuinermik ilaatigut ilaqarpoq.

Ilisimannittutut nassuiaateqartut akornanni isumaqatigiinnginneq

Eqqartuussisuuneqarfimmi ulluni pingasuni suliaqarnerup ulluata aappaani unnerluutigineqartut nassuiaateqartuni initunerpaanngillat, ilisimannittutulli nassuiaateqartut aqqaneq marluk initunerullutik. Kommunimi pisortaanerusimasoq, Kommuneqarfik Sermersuumi sulisut ilisimannittutullu nassuiaateqartussat nutaat suliami nassuiaateqarsimanngitsut ilaatigut nassuiaateqartuupput.

Tassani Lars-Emil Johansenip qanoq suliaqarsimanera pillugu isumaqatigiinngitsoqarpoq. 

Ilisimannittutut nassuiaateqartup ataatsip atornerluisuunermik katsorsaanermut atatillugu Kofoeds Skolemik Tasiilami pilersitsinermut akisussaasuusoraa, kommunimilu pisortaanerup tullersortaata soraarnerulluni kommunimut nammineq kajumissutsiminik nammineq suliaqalaartarsoraa – taamaammallu atuuffissaa annerusumik misissorneqarani. 

- Lars-Emil Johansenip Lars Møller-Sørensenimut qanoq suliaqartarnera misissornikuunngilarput. Aaqqissuussinermi tamarmi ajornartorsiuteqaaloreeratta, taamaammat pingaarnerunikuunngilaq, ilisimannittutut nassuiaateqartoq nassuiaavoq.

Ilisimannittullu allat taassuma suliaqarneranut ersarinnerusumik paasisimasaqarput.

Allattoqarfimmi sulisimasup Lars-Emil Johansenimut akissarsiassanik nassitsittarsimanini oqaatigaa, taassuma akissarsiani allannguutit misissornissaat suliaasa nalinginnaasut ilagaat. Taamaammat akissarsiassat 25.000-inik imaluunniit 40.000 koruuninik allassimasoqartumik pissarseqqaarami ajunnginnersoq paasiniarlugu pisortani saaffigaa.

- Taamani pisortara akissarsiassat allattorsimaffiat takoqqaarakku ilisimatippara. Taassuma taanna Lars Møller-Sørensenip Lars-Emil Johansenillu Tasiilami Kofoeds Skolemik pilersitsinissamut suliutigisaannut tunngasoq oqaatigaa, ilisimannittoq nassuiaavoq.

Suliaqarnermut akiliuteqarneq sammineqartoq

Lars-Emil Johansenimullu akiliuteqarneq – aamma siunnersortaalluni aalajangersimasumik atorfilittut akissarsiaqartinneqarnera – suliaminullu akiligassiisannginnera nalinginnaannginnersoq ilisimannittut nassuiaateqarneranni sammineqarpoq.

Kommunimi attaveqaqatigiinnermut pisortaasimasoq namminersortut aamma avataanit suleqatigisat Lars-Emil Johansenitulli akissarsialersorneqarsimasut arlallit assersuutigisinnaavai.

Kommunimili pisortaanerusimasoq allatut paasisimasaqarpoq, taassuma Kommuneqarfik Sermersuumi siunnersortit qanoq akissarsialerneqartarnersut pillugit unnerluussisussaatitaasup apeqqutaa ersarissumik akissuteqarfigaa.

- Akiligassiinikkut pisarpoq. Immikkut iliuuseqartoqarneq ajorpoq, akissarsiaqartinneqaraannimi aalajangersimasumik atorfeqartitsinerusarpoq, ilisimannittutut nassuiaateqartoq akivoq, taassumalu siunnersortit suliatik uppernarsaasersortuaannartussaagaat erseqqissaatigaa. Suliamilu uani taama iliortoqarsimanngilaq.

Taamaammat Lars-Emil Johansen Lars Møller-Sørenseimut siunnersuisussanngortinneqarnermini siunnersortitut suliaqarsimanersoq suli isumaqatigiinngissutaavoq. Taamaammat sulianut akiliuteqarnermullu apeqqut suli ammatinneqarpoq.

Eqqartuussivimmi suliaq aqagu nanginneqassaaq, Nunatta Eqqartuussisuuneqarfialu pilersaarut malillugu unnerluutigineqartut marluk unnerluutigineqartunut pisuunersut aalajangiiffigissavaa.