Politikeriusimasumut kommunimilu pisortaanerusimasumut Nunatta Eqqartuussisuuneqarfiani suliaq peqquserlunnermut tunngasoq

Januar 2025-mi siornatigut politikeriusimasoq Lars-Emil Johansen kommunemilu pisortaanerusimasoq Lars Møller Sørensen, suliami peqquserlunnermut, oqartussatut inissisimaffimmik atornerluisimasutut taamaliornissamullu peqataasimasutut eqqartuussaapput pisuutinneqarlutik, qaammatini arfinilinni pinerlussimasunut inissiisarfimmiittussanngortinneqarlutik. 

Taakku marluullutik eqqartuussut suliareqqitassanngortippaat, Nunattalu eqqartuussisuuneqarfiani suliaq ullumikkut aallartippoq pingasunngornerup tungaanut suliarineqassalluni. Tamatumuunali qaammatini aqqaneq-marlunni utaqqisitaasumik pineqaatissiisoqarnissaa unnerluussisussaatitaasumit piumasarineqarpoq.

Suliami 2019-imi aallartittumi atorfinitsitsineq qitiuvoq, Lars Møller Sørensenip Lars-Emil Johansen, naalakkersuisut siulittaasuusimasoq, siunnersortitut atorfinitsimmagu.

Unnerluussut: Suliamut naammassineqanngitsumut 730.000 kronet

Taamaattumik uppernarsaatinik saqqummiussinermi - imaluunnit Lars-Emil Johansenip suliarisimasaanut uppernarsaatissaqannginneq ataasinngornermi qitiupput - taamatuttaarlu isumaqatigiissummi sunarpiaq anguniarneqarsimaneranik apeqqut. 
Suliami unnerluussut ilaatigut imarivaat, Lars-Emil Johansen siunnersortitut suliaqarsimanngitsoq, taamaattorli ukiuni marlunni november 2019-imiit aggusti 2021-p tungaanut 730.000 kronenik akissarsitinneqarsimammat. 

Unnerluussaasut marluullutik suliaq aallartimmalli pinngitsuuneraannaavinnikuupput ataasinngornerullu ullaavani Nunatta Eqqartuussisuuneqarfiani pinngitsuuneraqqipput. Taamaattumik eqqartuussisuuneqarfimmi suliaq suliaq aallaqqaataaneerluni aallartippoq.

Suliami illersuisutut ivertinneqarsimasut nutaat marluk ipput. Julie Stage, arfanniarnermut akerliusoq Paul Watsonimut illersuisuusimanini ilaatigut ilisarineqaatigigaa, maannalu Lars Møller Sørensenimut illersuisuusoq, kiisalu Anders K. Németh Lars-Emil Johansenimut illersuisuusoq. 

Unnerluussaatitaasut naapertorlugit suliami apeqqut qitiusoq eqqartuussivimmisulli allannguuteqanngilaq: Lars-Emil Johanseni siunnersortitut akissarsissutigisinnaasaminik suliaqarsimava? 

Siunnersortaanissamut isumaqatigiissutip suut imarinerai isumaqatigiinngissutaasoq 

Lars Møller-Sørensen eqqartuussivimmi nassuiaasimavoq, Tasiilami Kofoeds skolemik aallartitsiniarnermik kissaateqartoqarmat, isumaqatigiissusiortoqarsimasoq, Lars-Emil Johanseni taassuminnga ikiuutissammat. Lars Møller-Sørensenili nassuiaatiginikuusaminut ullumikkut isumaqataavinngilaq.

- Politikkikkut siunnersuineq nalinginnaasoq isumaqatigiissummi annerusumik pineqarpoq. Politikkimi siunnersueqatigiinnissaq kissaatiginikuugakku. Taamanikkut politikkikkut akaareqatigiinnginneq atuuttorujussuuvoq. Allaffissornerup tungaatigut pissutsit taamaattut qanoq paasinissai pisariaqartissimavara. Taamaattoqarneratalu nalaani Kofoeds skolemik aallartitsinissaq aallunneqarneruleriartorpoq, Lars Møller-Sørensen oqarpoq.

Unnerluussallu akornanni allaganngorlugu isumaqatigiissummilu suliat suut pineqarnersut erseqqissumik allassimanngilaq. Eqqartuussisisup isumaqatigiissutip sooq taamaannera apeqqutigimmagu, Lars Møller-Sørensen akivoq:

- Taamanikkut pisariaqarsorinnginnakku. Massakkulli pisut aqqusaartillugit taamaaliorsimanissarput kissaatigisinnaavara. Nalunnginnatsiguli suna pineqarnersoq allannissaa eqqarsaatiginngilarput.  

Lars-Emil Johansenip eqqartuussivimmi nassuiaatiginikuusani annerusumik attatiinnarpaa, ataasiakkaat minillugit. Ataasiakkaat taakku sunik imaqarpiarneri, ataasinngornermi saqqummiunneqanngilaq, piffissaliussaq naammakkunnaarmat eqqartuussisuuneqarfiullu ilisimannittut nassuiaataat salliutittariaqalermagit. 

Ilisimannittut katillugit pingasut eqqartuussisuuneqarfimmi ataasinngornermi nassuiaateqarput, ilisimannittoq ataaseq Finlandimiinnini peqqutigalugu kiisalu eqqartuussivimmut ilisimannittutut siornatigut aggersarneqareerluni takkunnikuunngimmat taamaatiinnarneqarpoq. Ilisimannittutulli nassuiaateqartut pingasuusut tassaapput Kommuneqarfik Sermersuumi ilinniagartuutut atorfiliusimasoq sulisoqarnermilu pisortaasimasoq, Kommuneqarfik Sermersuumi borgmesteriusimasoq kiisalu Komuneqarfik Sermersuumi atorfeqarnikuusimasoq alla.  

Suliaq eqqartuussisuuneqarfimmi aqagu nageqqinneqassaaq, ilisimannittut arfineq-pingasut nassuiaateqariartussallutik.