Peqqinnissaq Pillugu Kattuffimmi siulittaasoq: - Avataaniit suliartortut qanoq pisariaqartitsiginerivut takusinnaavarput

Danskit peqqissaasut nunatsinnut suliartortartut atugassarititaat isumaqatigiissuteqarnikkut pitsanngorsaavigineqarput. Tassani akissarsiami qaavatigut immikkut pissarsisalernissaat, angalanerminni akiliunneqartarnissaat sulinerminnilu inigisaminnut akiliunneqartalernissaat isumaqatigiissutigineqarlutik.

Tamannalu avataaniit suliartortunik qanoq pisariaqartitsitiginersugut takussutissaasoq, Peqqinnissaq Pillugu Kattuffiup siulittaasuata Navarana Johansenip KNR-imut oqaatigaa.

- Paarlakaallutik suliartortarnissamut aaqqiisoqarneq tunngaviatigut ajorinngilara. Tassuunartaatigut takuneqarsinnaalerpoq avataaniit suliartortartut qanoq pisariaqartitsiginerigut, Navarana Johansen oqarpoq.

Tikillutik suliartortartut amerlanerit, nunatsinni sivikippallaamik suleriarlutik aallaqqittartut amerlagaluartut nunatsinni peqqinnissaqarfitsinnit pisariaqartinneqartut taanna oqaluttuarpoq.

Nunami tamakkerlugu peqqinnissaqarfiup iluani avataaniit tikillutik suliartorallartartut 100-t 140-llu akornanniipput.

Avataaniit suliartorlutik tikittut pitsaanerusumik atugaqarnerannik nunaqavissut misiginissaat Navarana Johansenip ernumassutigaa:

-Ernumassutikkali uaniipput, maani Kalaallit Nunaani ataavartumik sulisut nunaqavissut misiginissaat avataaninngaanniit takkuttut pitsaanerusumik atugaqartut naaminerminngaanniit, taanna oqarpoq.

Taannaannaanngilarli.

Pisariaqartinneqartumut naammanngitsut

Isumaqatigiissutaasormi naapertorlugu peqqissaasut tikillutik suliartortut 30-t missaanniittut taamaallaat sulinermi saniatigut pissarsisassasut allaqqavoq. Tamannalu aamma tikittartut ikilisinnaanerannik kinguneqarsinnaanera Navarana Johansenip ernumassutigaa:

-Pisariaqartinneqartumut naammanngillat. Taava ernumassutigisinnaavara nalinginnaasumik vikarit tikittartut, namminersorlutik oqartussat isumaqatigiissutitsinni, isumaqatigiissuterput aqqutigalugu tikittartut ikilinissaat ernumassutigisinnaavara, taanna oqarpoq.

Nunatsinni Danmarkimilu akissarsiatigut nikingasoqarnera nunatsinni suliffissat inuttaqannginneranut peqqutaaqataasut ilagaat, nunatsinnimi peqqinnissaqarfimmi sulisut akissarsiakinnerupput.

- Tassuunartaatigut assigiinnerulersinnaagutta pitsaanerussagaluarpoq aamma orniginarnerulissagaluarpoq maani Kalaallit Nunaani sulisinnaaneq, taanna oqarpoq.

Navarana Johansenillu aaqqiissutip iluaqutaalluarnissaa neriuutigaa.

Peqqinnissaqarfimmullu suliartorlutik tikittartut nunatsinni pissutsinut naleqqussarneri nukippassuarnik atuinarsinnaasarmat, nunatsinni sulinermik misilittagaqareersunik suliartoqqittoqarnissaa taassuma aamma neriuutigalugu oqaatigaa.

- Iluaqutaanissaanut neriuutigivara. Ataavartumik tikittartussat amerlinerunissaat. Taavalu maani Kalaallit Nunaanni sulinermik ilisimasaqarluartunik peqalernissaa. Tikinnerit tamaasa ilitsersuussassaanngitsunik amerlanernik, taanna oqarpoq.

Isumaqatigiissut 2029-p naanissaanut atuutissaaq.