Nunaqarfinni aqutsisut siulittaasuat: Narsarsuaq nunaqarfittut qanoq ingerlariaqqissava?

Qaqortumi mittarfiliornissaq pilersaarutaalermalli Narsarsuup siunissaa nalornissutigineqalerpoq.

Nalornisut ilaagaat Kommune Kujallermi nunaqarfinni Qassiarsummi, Igalikumi Narsarsuarmilu aqutsisut siulittaasuat Mouritz Karlsen (IA).

-Qinikkatut innuttaasut sinnerlugit ipianngunartorujussuuvoq. Aamma qanoruna siunissami pilersaarusiussasugut imaluunniit pissutsit utaqqiinnassavagut? Taannalu qinikkatut uanga nuanniilliutigisorujussuuara killiffik, Mouritz Karlsen KNR-imut oqarpoq.

Narsarsuarmiut inuussutissarsiorusuttut kommunertik Naalakkersuisullu qanoq siunniussaqarnermik siumungaaq paasitinneqartariaqartut, taanna ammasumik allakkamini ilaatigut allaaserai.

Amerikarmiut soqutiginnittut

Amerikarmiut nunatsinni sakkutooqarfilioqqinniarlutik pilersaartut qallunaat tusagassiuutaanni DR-imi apriilip 15-ianni saqqummiunneqarpoq.

Tassani Amerikarmiut Københavnimi aallartitaqarfiat kiisalu Washingtonimi oqartussaasut sinnerlugit mittarfiup qanoq innera, umiarsualiviup eqqaani immap itissusia ineqartitsinissamullu periarfissat sakkutuut imarsiortut naalagaata immikkut soqutigalugit Narsarsuarmut misissuiartorsimasoq DR allappoq.

Narsarsuaq sakkutooqarfinngoqqissanersoq Mouritz Karlsenip paaserusuppaa. 

-Sakkutooqarfittut ingerlassaguni ilumut ingerlaqatigissinnaappat nunaqarfittullu sakkutooqarfittullu? Taanna misissoqqunartorujussuuvoq tassani paasissagatsigu qanoq ingerlariaqqissinnaaneq. 

Matoqqasunngornissaa ernumassutigigaa

Amerikarmiut sakkutooqarfiannut Pituffimmiittumut, Pituffik Space Basemut, iserniaraanni najugaqarnissamut immikkut akuersissummik peqaqqaarluni aatsaat isertoqarsinnaavoq. 

Narsarsuaq sakkutooqarfittuinnaq ingerlalissappat Mouritz Karlsenip tamanna ernumassutigaa.

-Misilittakkani taanna takoreerparput matoqqasunngortartoq akuleruffigiuminaatsorujussuanngortartoq sakkutooqarfinngoraangat. 

Sakkutooqarfiutigalunili nunaqarfiusinnaappat periarfissatsialaasinnaasoq Mouritz Karlsen isumaqarpoq. 

-Periarfissatsialattut aamma isigisinnaavarput sakkutooqarfiutigaluni nunaqarfiusinnaappat. Ingerlalluartoqaleriartorsinnaavoq. Suleqatigiissinnaappata suliffeqarfiutillit allat inerisaarusuttullu taava sakkutooqarfik aamma ingerlaqataasinnaavoq.