Illersornissaqarfik Issittoq pillugu isumaqatigiissuteqartoqarneratigut nammineq talittarfittaassasoq

Illersornissaqarfik umiarsuit takornariartaatit aalisariutillu Nuummi umiarsualivimmi talittarfiit ataatsimoorfigiunnaassavaat.

Issittoq pillugu isumaqatigiissutip immikkoortuata aappaata tallimanngormat isumaqatigiissutigineqarneratigut Illersornissaqarfiup umiarsui namminneq talittarfeqalissapput.

Illersornissamut ministereqarfik tusagassiuutinut nalunaarummi paasissutissiivoq.

Talittarfik Nuummi umiarsualiviup allilerneqarneranut atatillugu pilersinneqassaaq.

Tamanna Illersornissamut ministereqarfiup kalaallillu suliffeqarfiutaata, Namminersorlutik Oqartussanit pigineqartup Sikuki Nuuk Harbourip suleqatigiinneratigut pissaaq.

Illersornissamut ministerip, Troels Lund Poulsenip Illersornissaqarfiup sulinermi atugassarititaasa sapinngisamik pitsaanerpaanissaat "pingaaruteqarluinnarnerarpaa".

- Illersornissaqarfiup Sikuki Nuuk Harbourillu suleqatigiillutik Illersornissaqarfiup umiarsuinut talittarfimmik pilersitsinissaat naammagisimaarluinnarpara, Troels Lund Poulsen oqarpoq.

Ukiap ingerlanerani alliliisoqassasoq

Talittarfiup qaqugu atorneqalernissaa tusagassiuutinut nalunaarummi allassimanngilaq.

Nuummili umiarsualiviup allilerneqarnissaa ukiap ingerlanerani aatsaat suliariumannittussarsiuunneqassaaq.

Talittarfik najukkami innuttaasunut aamma iluaqutaassaaq. Tassa talittarfik Illersornissaqarfimmit iligisanilluunniit talissimatitsisoqanngikkaangat umiarsuarnut allanut atorneqarsinnaasunngorlugu ammarneqartassaaq.

Tamannalu nunatsinni Issittumi Sakkutooqarfiup pisortaata, Søren Andersenip nuannaarutigaa.

- Sakkutuut talittarfiat najukkami suliffeqarfiit pisiortorfiillu atuisinnaanerulersissavai, minnerunngitsumillu Sikuki Nuuk Harbourip qanimut suleqatigineranut nukittorsaassalluni, Søren Andersen oqarpoq.

Issittoq pillugu isumaqatigiissummi nutaami issittumi umiarsuarnik marlunnik pilersitsinissamut aamma aningaasaliisoqarpoq.

Issittumi umiarsuit pingasunik nutaanik ilaneqarnissaat isumaqatigiissutaareerpoq.

/ritzau/