Hamasip sallunaveeqqutitut tigusat sinneruttut Røde Korsimut tunniukkai
Hamasip, inuit arfineq-marluk ullaaralaakkut iperagaasut saniatigut, Israelimiut sallunaveeqqutitut tigusat allat 13-it ataasinngornermi ullorortoq iperarpai.
Taama nutaarsiassaqartitsivik AFP Israelimiut radioanut innersuussilluni allappoq.
Sallunaveeqqutitut tigusat Røde Korsimut tunniunneqarput.
Inuit sallunaveeqqutitut tigusat suli uumasut 13-it iperagaaneri pillugit nalunaartoqartoq, Israelimiut tusagassiorfiat Times of Israel aamma allappoq.
Taamaalilluni Hamasimi pikisitsisut sallunaveeqqutitut tigusat sinneruttut tamakkerlugit tunniuppaat.
Inuit 13-it tuniunneqarsimaneri inoqatinut attaveqaatini X-imi Israelimiut sakkutuuisa IDF-ip uppernarsarpaat. Taakkua maanna Gazami IDF-ip sakkutooqarfianukaartut, sakkutooqarfik nalunaaqutaq 10.30 sioqqutilaarlugu allapput.
Tassanngaanniit Israelimut ingerlaqqissapput.
Sallunaaveeqqutitut tigusat iperagaasut siulliit arfineq-marluk Israelimiilereerput.
Hamasip sallunaaveeqqutitut tigusat 48-t tunniunneqarnissaat akuersaarpaa, taakkunannga 20-t uumapput.
Sallunaaveeqqutitut tigusat toqusimasut 28-t pillugit qanoq pilersaaruteqartoqarnersoq ilisimaneqanngilaq. Toqungasut timaat Røde Korsimut ualeru tunniunneqassasut, Times of Israel allappoq. Tusagassiorfik saudiarabiamiut tv-kut aallakaatitsisarfiannut Al-Hadathimut innersuussivoq.
Israelip illoqarfissuani Tel Avivimi sallunaaveeqqutitut tigusat sumiiffiannut tuusintillit arlaqartut isiginnaarussuakkut iperagaasunut malinnaajartorlutik katersuupput.
Nutaarsiassaqartitsivik AP naapertorlugu, sallunaaveeqqutitut tigusat siulliit arfineq-marluk danskit nalunaqutaat malillugu 07.20 missaani iperagaammata, ilaqutaasut ikinngutaallu nuannallutik nillerrapput.
Arlallit amerikamiut præsidentianut innersuussillutik “qujanaq Trump”-imik suaartarput, taanna sallunaveeqqutitut tigusat pillugit aamma Gazami sakkuaattoqarunnaarnissaanut isumaqatigiissummut atatillugu malunnaatilimmik iliuuseqartuuvoq.
Hamasimi pikisitsisut Israelimik oktobarip 7-iani 2023-mi saassussimmata katillugit israelimiut 251-it sallunaveeqqutitut tigusarineqarput.
Gazami ukiuni marlunni sorsuttoqarnerani sallunaveeqqutitut tigusanik arlaleriarlutik iperaasoqartarpoq.
Israelimiut sallunaveeqqutitut tigusat 48-t ataasinngornermi iperagaasussat taartigalugit, Israelip palæstinamiut 1900-nit ikinnrunngitsut Israelip parnaarussivissuiniittut iperagaatinniarpai.
Taakkunani parnaarussat 250-it inuunertik naallugu pillaatissinneqarnikuupput. Palæstinamiulli amerlasoorpassuit tigummigallarneqartuupput. Taakkua suli eqqartuunneqarnikuunngillat.
Israelip parnaarussat palæstinamiut ataasinngornermi ullaakkut Gazamukaassisussaannut bussinut issoraappaat.
Amerlanerpaartaat Khan Yunisimi Gazap kujasissuaniittumut Nasserip napparsimmavissuanukaanneqarnissaat ilimagineqarpoq.
/ritzau/
