Nuummi umiarsualivik allilerneqarujussualersoq

Nuummi umiarsualivik aasaalernerani juunillu qanilliartornerani ulapaarfiuvoq.

Tamannali qanittukkut qaangiutingajalerpoq, Sikuki Nuuk Harbourimi Nuummi umiarsualivimmik piginnittuusumi pisortaaneq John Rasmussen oqarpoq.

- Maajip qaammataanit septembarip qaammataa ilanngullugu umiarsualivimmi talittarfiit naammanngillat. Taamaattumik talittarfiup allilerneqarneratigut taliffissat ilaneqarnissaat eqaatsumillu sullissisoqarsinnaanissaa qulakkeerneqassaaq.

Namminersorlutik Oqartussat suliffeqarfiutaata Nuummi umiarsualiviup allilerneqarnissaanut suliariumannittumik nassaarsimanertik tallimanngormat nalunaarutigaat.

KJ Greenland soqutiginnillutik suliarinnikkumasut akornanni toqqagaavoq.

Umiarsualivimmut inuussutissarsiortunullu iluaqutaassasoq

Qeqertaq Avannarlermi containerinut ilisivik talittarfimmik nutaamik 350 meterinik ilaneqassaaq.

200 meterit kilisaatinut atorneqassapput, 150-illu meterillu Illersornissaqarfimmit sakkutuut umiarsuaannut pingaarnertut atorneqassallutik.

- Containerinut tikiussuiffiup eqqaani talittarfeqalernissaa atuisunut pitsaalluinnassaaq, talittarfillu 150 meteriusoq Illersornissaqarfimmit atorneqanngikkaangat, tulattussat allat atorsinnaassavaat, John Rasmussen oqarpoq.

Umiarsualiviit allilerneqarpata umiarsuarnut takornariartaatinut niueriartunullu pitsaanerusumik aamma atugassaqartitsisoqarsinnaanera eqqaavaa.

- Umiarsualiviup allilerneqarneratigut Nuummi umiarsualivimmi angallattoqarsinnaanerulissaaq ajornannginnerusumillu sullissisinnaanerulissalluta, John Rasmussen oqarpoq.

Aammattaaq talittarfimmi periarfissat nutaat Nuummi inuussutissarsiornermut periarfissanik annertusaasinnaapput, soorlu sakkutuut umiarsuaat sivisunerusumik talittarfinniissinnaalerpata.

- Umiarsuit Nuummi angallannerpaaffianni aserfallatsaaliuisoqarsinnaanngilaq, ulluni arlalinni talittarfimmiittariaqassammata. Umiarsuit taliffissaqarnatik aallaqqittariaqaleraangamik utoqqatsinartarpoq, naak Nuummi inuussutissarsiortut suliassanik tamakkuninnga suliaqarsinnaagaluartut, John Rasmussen oqaluttuarpoq.

Taassumap KJ Greenlandip Sikuki Nuuk Harbourillu inaarutaasumik isumaqatigiissutaata sapaatip-akunnerisa tulliuttut ingerlaneranni atsiorneqarnissaa naatsorsuutigaa.

Umiarsualiviup allilerneqarnerata novembari 2028-mi naammassineqarnissaa naatsorsuutigineqarpoq.

Suliariumannittussarsiuussinerit siornatigut iluatsinngitsoortartut

Umiarsualiviup allilerneqarnissaa ukiut marluk matuma siornali suliariumannittussarsiuunneqarpoq, Sikuki Nuuk Harbourili taamani suliariumannittussarsiuussiunnaartariaqarsimavoq.

- Suliarinnikkumallutik neqeroortut taamanikkut nalilersorpagut, neqeroorutilli amerlanerit missingersuusiatsinnit qaffasinnerummata allatigullu nangaassuteqaratta neqeroortut akuerisinnaanngilagut, John Rasmussen oqarpoq.

Suliffeqarfiup umiarsualiviup allilerneqarnissaanut piumasaqaatit qanoq pitsaanerulersissinnaanerlugit tamatuma kingorna misissorpaat, Illersornissaqarfillu umiarsuarminnut sorsuummut talittarfimmik 150 meterisut takitigisumik soqutiginnilluni nalunaarpoq.

Piumasaqaatit suliariumannittussarsiornerullu annertussusaa taamaalillutik pitsaanerulerput.  

- Taamaalilluta umiarsualiviup allilerneqarnissaa kiisami piviusunngortissinnaanngorparput. Tamannalu tamatta nuannaarutigeqaarput, John Rasmussen oqarpoq.

Taassumap suliffeqarfiit arlallit alliliinissamut suliarinnittuujumallutik neqeroorsimanerat oqaluttuaraa, neqeroortullu nunatsinninngaanneersuinnaannginnerat.