Sapaatip-akunneranut nalunaaquttap akunnerini 37-ni sulisalernissaq akissarsiaqalernerunissarlu politiinut piviusunngortoq
Sapaatip-akunneranut sulinikinnerulernissaq 'akissarsiallu amerlineqarnissaat' Kalaallit Nunaanni Politiit isumaqatigiissutaat nutaaq apriilip aallaqqaataani atuutilermat qilanaarutigisinnaanngorpaat.
Nuummimi Bornholmimiluunniit politiini sulineq assigiinngissuteqarunnaassaaq.
- Tamanna uagutsinnut pingaaruteqarluinnarpoq. Ukiorpassuarni tamanna sorsuutigaarput, politiit kattuffianni siulittaasoq Heino Kegel oqarpoq, taannalu isumaqatigiissummik nutaamik saqqummiussiartorluni Nuummeeqqammerpoq:
- Danmarkimi politiiuneq Kalaallit Nunaannilu politiiuneq ukiorpassuarni assigiinngissuteqarpoq. Kalaallit Nunaanni atorfilik akissarsiakinneruvoq sulinermullu atugassarititaasut ajornerusarput.
Sulineq sapaatip-akunneranut akunnernit 40-nit 37-nut ikilineqartut Heino Kegel oqaluttuarpoq, sulisullu amerlanerit qaammammut 2.000 koruuninit 5.000 koruunit tungaannut akissarsiaqarnerulernissartik naatsorsuutigisinnaagaat.
Ungasissumiittut puigugaaqqasullu
Politiit maanna atugarissaarnerunissaat iluuseqarnikkut piviusunngorpoq.
Kalaallit Nunaanni Politiit Peqatigiiffianni siulittaasup, Bjørn Bjerregårdip, suliarujussuaq suliarisimavaa, Heino Kegel oqaluttuarpoq:
- Bjørnip tamanna iluatsinnissaa anguniarlugu uagutsinnut Danmarkimiittunut uteriilluni piumasaqartuarpoq. Ungasissumiikkaanni puigugaapallannarnerusarpoq.
Aamma Kalaallit Nunaanni Politiit pisinnaatitaaffitik pillugit akiuuttariaqarsimanerat ilisimaneqarluarpoq.
Politiinut isumaqatigiissut nutaaq pitsaanerusorlu, nunatta Danmarkillu akornanni akissarsiat nikingassutaasa ilaannik matussusiisussaq 2020-mili siunniunneqarpoq. Isumaqatiginninniarnerilli iluatsinngitsoornerata kingunerisaanik, ukiut sisamat qaangiummata aatsaat isumaqatigiissusiortoqarpoq.
- Isumaqatigiissut nutaaq ukioq manna atuutilermat Kalaallit Nunaanni Politiit Danmarkimi isumaqatiginninniartoqaqqaarnissaa utaqqisariaqarunnaarpaat, kingornalu namminneq isumaqatiginninniaqqaartariaqarunnaarlutik. Danskit inatsisaat isumaqatigiissutaallu maanna malinneqarput, Heino Kegel oqarpoq.
Taassumap isumaqatigiissut nutaaq pillugu marlunngornermi ataatsimiinnermi isumalluartoqangaarsimanera oqaluttuaraa:
- Danmarkimi suliffimmi atugassarititaasunik maanna atugaqartitaalernerat taakkununnga qularnanngitsumik pingaaruteqarnerpaavoq.
Suliffinni avatangiisit ajortut
Heino Kegel Kalaallit Nunaanni Politiini sulinermi atukkat pillugit qaammammi matumani siusinnerusukkut isornartorsiuivoq.
Naalagaaffiup politiivisa suliffimmi avatangiisit pillugit misissuinerat nutaajunerpaaq naapertorlugu, Kalaallit Nunaanni Politiivini sulisut, suliffimmi avatangiisit tarnimut sakkortunerat pissutigalugit, ataatsimut isigalugit napparsimallutik sulinngitsoornerpaajupput, suliassaminnik angummanniarnertik ajornakusoortittarpaat suliffiup avataatigut inuunissaminnut piffissakilliornerpaallutik.
- Tamaani ilungersunartut tassaapput suliassarpassuaqarnera sulisullu ikippallaarnerat - pingaartumik sinerissami. Ajornartorsiut imaaliallaannaq aaqqiivigisassaanngilaq, Heino Kegel oqarpoq nangillunilu:
- Tamaani politiit imaaliallaannaq amerlanerulersinneqarsinnaanngillat. Sulisulli amerlanerulerpata sapaatillu-akunneranut akunnerni 37-ni sulisalertoqarmat, sulinermi avatangiisit pitsaanerulertussaassapput.
Kalaallit Nunaanni Politiit pisortaat, Bjørn Tegner Bay, politikkikkut siorna isumaqatigiissut, politiit ilaatigut atorfinitsitsinissamut 850 millionit koruuninik pissarsiaqaatigisaat pillugu KNR-imut oqarpoq, imaattariaqanngitsoq politiit sulisussaaleqisut.
- Bjørn Tegner Bay isumaqatigalugu sammivik eqqortup tungaanukarluta oqarsinnaavunga. Isumaqarpungali inuiaqatigiittut ukiorpassuarni sumiginnaasimasugut, iliuuseqanngiinnartoqarsimasoq taamaattumillu suliassat ima angujuminaatsigilersimapput iliuuseqapallattoqartariaqalerluni, qujanartumillu maanna taamaaliortoqarpoq, Heino Kegel oqarpoq:
- Kalaallit Nunaanni Politiit ataavartumik aningaasaliiffigiuarneqartariaqarput.
