Siumut: Ilulissani Nalunaarutip suli atuunnerata uppernarsaqqinneqarnissaa pillugu Ruslandimik aggersaanissamik kaammattuisut

Ilanngutassiap siullermk qulequtarisaa nalunaaquaq 16.48 allanngortinneqarpoq, siullermik qulequtarisaa Siumup Ruslandimi siuttut nunatsinnukartikkusukkai paasineqarsinnaasimammat. Tamannali eqqortuunngilaq.

Issittup sakkulersorfiunanilu eqqissisimasumik pissusilersorfiunissaa pillugu Ilulissani Nalunaarut Inatsisartuni ippassaq sisamanngornermi oqallisigeqqinneqarpoq.

- Ilulissani Nalunaarut suli atuuttutut isigineqarnersoq, tassa Issittoq sakkulersorfiussanngitsoq aamma eqqissisimasumik pissusilersorfiussasoq apeqqutigineqaqqittariaqarpoq, Erik Jensen ilaatigut oqarpoq.

Ilulissani Nalunaarut suli atuuttutut isigisariaqarnersoq paasiniarlugu eqqartoqqinneqartariaqartoq, Kalaallit Nunaatalu aggersaaneratigut tamanna pisariaqartoq, Siumup siulittaasuata Aleqa Hammondip siorna oktobarimi allagaqaatigaa.

Ruslandip Issittumi sakkutooqarfini pingaartumik 2014-ip kingorna ammaqqissimavai. Immikkut ilisimasallit naapertorlugit Rusland Sorsunnerup Nillertup aatsaat taama siooranartigilerpoq. Issittulli sakkulersorfiunnginneranik oqartoqarnera pisoqanngortoq aamma oqaatigineqarpoq.

Danmarkimi ministeriunerugallartup Mette Frederiksenip KNR-imut taassuma saniatigut oqaatigereerpaa Issittoq sakkulersorfiunerulersimasoq.

Ruslandimik oqaloqateqarusunneq

Ilulissani mittarfittaassaq ammarpat Rusland Ilulissanut aggersarneqartariaqartoq, Naleqqap siulittaasuata Pele Brobergip KNR-imut oqaatiginikuuaa.

- Mittarfik atulerpat Ilulissaniit isumaqatigiissut uppernarsarneqaqqinneqartariaqarpoq, tassanilu issittumi eqqaamiugut pingaaruteqarput.

Pele Brobergip oqaasii pillugit allaaserisaq oktobarimi saqqummersinneqarmat taassuma erseqqissaatigaa atorfilittat Ruslandimilu politikkikkut aqutsisuunngitsut qaaqquniarai.

Rusland Ilulissani Nalunaarummik 2008-mi atsioqataammat, Ruslandip nunanut allanut tunngasunut ministeria Sergej Lavrov Rusland sinnerlugu atsioqataavoq. Assi © : Russian Foreign Ministry/Reuters/Ritzau Scanpix

Ruslandip Ukraine 2022-mi saassutilerpaa, Kalaallit Nunaatalu Ruslandillu suleqatigiinnerat taamanikkut unitsinneqarluni.

Vivian Motzfeldt(Attaviitsoq) taama oqaluttuarpoq, Ilulissanilu Nalunaarutip uppernarsaqqinneqarsinnaanera piviusorsiortuunersoq Erik Jensenimut apeqqutigalugu.

Ilulissani Nalunaarutip atsiorneqarnissaa pillugu Erik Jensenip Rusland tassani aggersarpaa.

- Oqaatigissavarput, aggersaasinnaanermik oqaloqatigiissinnaanermillu oqarneq imaanngilaq akuersaaripput iliuuserisimasai, Ukrainemut, aammalu nunanut allanut. Isumaqartugununa, taanna isumaqatigiissut atorunnaarsissimaneranik qukakkeerinninniarneq paasisariaqarnersoq. Taava taamaalilluta allanik alloriarfissanik oqaloqatigiinninnernillu pitsaasunik ujartuisariaqarnerput taanna ingerlattariaqalissagatsigu.

- Eqqisseqatigiittoqarnissaa pillugu oqaloqatigiinniarta.

Ruslandip Ukraine saassutilermagu Ruslandip Kalaallit Nunaatalu suleqatigiinnerat unitsinneqarpoq, tamannalu pillugu Ilulissani Nalunaarutip uppernarsaqqinneqarnissaa piviusorsiortuunersoq Vivian Motzfeldtip(Attaviitsup) inatsisartut oqallinneranni Erik Jensenimut apeqqutigaa. Piviusorsiornerusoq Erik Jensen isumaqarpoq. Assi © : KNR / Markus Valentin

Kalaallit Nunaannut piviusoq nutaaq

Kalaallit Nunaata sakkutuulersorfiunerulernera oqallinnermi aamma eqqartorneqarpoq.

Vivian Motzfeldtip nunanut allanut naalakkersuisuunerata nalaani nunarput sakkutuulersorfiunerulerpoq.

Inuiaqatigiinni allanngoriartortoqartoq taassuma oqaatigaa.

- Nunatut sorsoqataasimanngisaannartutut assigiinngitsutigut iliuuseqartoqarneranut sungiussisariaqarpugut.

Kalaallit Nunaanni sorsuttutut kingullermik iliuuseqartoqarmat tamanna 1739-mi juunip arfernanni pisoqarpoq, Jacob Severinip Pukkittormiullu umiarsuaasa akornanni Ilulissat avataanni imaani taamanikkut akiuuttoqarmat.