Nuummi ilinniarfiup nutaap peqqinnissamik suliaqartoqartilissagaa

A.P. Møllerip Aningaasaateqarfia Nuummi peqqinnissaqarnermik suliaqarnermut ilinniarfimmut nutaamut 60 millionit koruuninik aningaasaliivoq.

Naalakkersuisut tusagassiuutinut nalunaarummi paasissutissiipput.

Ilinniarfik ilinniartunut ilisimasanik suliaqartitsiviunissamut periarfissiinissaa pissutigalugu 'Illu Sungiusarfimmik' taagorneqarpoq.

Tamanna 'piviusuusaartitsinermik tunngaveqartumik atuartitsinermi' ilisimasanik sungiusarnikkut ilaatigut pissaaq.

Naalakkersuisut ilinniarfiup ilinniartoqarnerulernissaanut kiisalu peqqinnissamik ilinniakkamik naammassisaqartoqarnerulernissaanut tapersiissutaanissaa naatsorsuutigaat.

Aappaagu sanaartorneqassasoq

Illu sungiusarfiup 1.000 kvadratmeteriunissaa naatsorsuutigineqarpoq, naalakkersuisullu taanna Dronning Ingridiup Napparsimmavissuata eqqannguani sanaartorneqassanerarpaat.

- Illup sungiusartarfittaassap inissisimaffissaa immikkut ittunik pisoqartillugu – assersuutigalugu ajutoornerni annertuuni imaluunniit upalungaarsimanissamut atatillugu – Peqqinnissaqarfiup ataatsimut periarfissaanut ilanngunneqarsinnaanissaanuttaaq periarfissiissaaq, tusagassiuutinut nalunaarummi allassimavoq.

Ilinniarfik sanaartorneqarnissaa illussanik titartaasarfiup Tnt Nuup aamma Peqqinnissaqarfiup, Peqqissaanermik Ilinniarfiup aamma Peqqissaanermut Pinngortitamullu Ilisimatusarfiup suleqatigiinneratigut suliarineqassaaq.

Pilersaarutit malinneqassappata ilinniarfissap aappaagu piareernissaa naatsorsuutigineqarpoq.

- Neqerooruteqartitsinermut atatillugu neqeroorummik pissarsisoqareerpat, sanaartugassap akissaa tamakkiisoq aalajangersarneqassaaq, tusagassiuutinut nalunaarummi allassimavoq.

Sulisussaqarneruneq

Ineqarnermut, Attaveqaasersuutinut, Isorliunerusunullu Naalakkersuisoqarfiup suliniummik sanaartortitsisuussaaq.

Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisup Aqqaluaq B. Egedep nuannaarutiginninnini tusagassiuutinut nalunaarummi oqaatigaa:

- Suliniutip aningaasaateqarfimmit namminersortumit aningaasaliiffigineqarnera, aningaasaateqarfiup inuiaqatigiinni pingaarutilinnik tapersersuisinnaaneranut ilinniartitaanermilu Peqqinnissaqarfimmilu pitsaassutsimik kivitseqataasinnaaneranut assersuutissaqqissuuvoq, taanna allappoq.

Peqqissutsimut Inunnullu Innarluutilinnut Naalakkersuisup, Anna Wangenheimip (D) ilinniarfik nutaaq peqqissutsikkut suliaqarfiit assigiinngitsut sulisussaqalernissaannut qulakkeerinneqataassanerarpaa:

- Peqqinnissakkut sullissisunik pisarialinnik ilinniartitsineq sulisussarsiniarnerlu, Peqqinnissaqarfimmut ingerlalluartumut pingaaruteqarluinnarput. Ullumikkut immikkoortortat sulinermik sungiusarfissat amerlassusaat qassinik ilinniartoqarsinnaanermut killiliisuuvoq.