Isorinnittoqareermat: Isumaqatigiissummi oqaluttaasarneq pillugu immikkoortoq peerneqartoq
Peqqinnissaqarfimmi sulisut isumaqatigiissutaanni nutaami, sulisut sulinerminnut atatillugu oqaluttaasarnissaannik nutsigassanillu ikiuuttarnissaannut tunngasumik allaqqasoqarunnaarpoq.
Sapaatip akunnera tamannarpiaq oqallisigineqareersorlu, sulisoqarnermi illuatungeriit tamanna pillugu oqaasertaliornerup isumaqatigiissummiit peerneqavinnissaa aalajangerpaat.
Tamanna PPK-p naalakkersuisullu tallimanngornermi unnukkut peqataasunut ataatsimut nalunaarutigivaat.
Peqqissutsimut inunnullu innarluutilinnut naalakkersuisoq Anna Wangenheim (D) Aningaasaqarnermut akileraartarnermullu naalakkersuisoq Muté B. Egede (IA), tamanna pinngitsiartoq oqallinnermut ilanngupput.
Tusagassiuutitigut nalunaarummi allaqqasoq naapertorlugu naalakkersuisut "peqqissutsimut suliaqartunut oqalutsitut sulisinneqarnissaanik oqariartorneq sakkortuumik akuersaangilaat, pingaartumik aningaasatigut tapitaqanngitsumik."
Isumaqatigiissummi immikkoortortap ilanngunneqarnera, peqqinnissaqarfimmi sulisunut kalaallisut oqaluttunut oqaluttaasarnerup ilungersortitsiunnaarnissaa naatsorsuutaajunnaarnissaalu, PPK-it tunngavilersuutaavoq.
Tallimanngornermili unnukkut isumaqatigiissusiortuniit, PPK-miit naalakkersuisuniillu, nalunaarut unaavoq:
- Tamanna (inerniliussami oqaaseqatigiiliorneq. aaqq.) allarluinnarmik kinguneqarnera maanna takusinnaavarput. Taamaattumik illuatungeriit immikkoortortap peerneqavinnissaa isumaqatigiissutigivaat, taakku allapput.
Peqqissaasut: Nutaarsiassaq nuannaajallannartoq
Nyheden om at punktet er blevet fjernet har vækket glæde hos nogle af de sundhedsansatte, som KNR har været i kontakt med.
Immikkoortortap peerneqarnera pillugu nutaarsiassaq, peqqinnissaqarfimmi sulisut ilaannut, KNR-imiit attavigineqarsimasunit, nuannaajallatsitsivoq.
Peqqissaasoq Navarana Helena Johanseni oqaluttaasarneq pillugu immikkoortortamik isorinnittut ilagaat, taanna KNR-imut nalunaarpoq, immikkoortortap peerneqarnera nuannaarutigalugu.
Suleqataatalu Beannguaq Høyer-Lyberthip suleqatinut oqaluttaasarunnaarnissaq nuannaarutigivaa.
- Peerneqarnissaa periarfissaanngitsoq ilisimatinneqarpugut. Kingusinaareernerarluta. Taamaattumik tallimanngornermi unnukkut mailinnakkama nuannaaqaanga. Tamannami isumaqarpoq suliatsinnut ilinniagalittut angusaqartugut, KNR-imut oqarpoq.
PPK sapaatip akunnera una isumaqatigiissut nutaaq pillugu paasisitsiniaallutik ataasimiisitsissapput.
Isumaqatigiissut nutaaq pillugu taasissutiginninneq aggustip 6-iani aallartippoq ullunilu suliffiusuni 20-ni sivisussuseqassalluni.
