Nunatsinni qaannamik pissartanngorniunnerit pingasunngornermi aallartissapput

Qaannamik parrunnermi, kinngusaaqattaarnerni allunaariaqattaarnermilu ukioq manna pissartanngorniunnerit nuannaffiunissaannut pilersaarusiortoqarpoq.

Pissartanngorniunnerit Nuummi Inussivimmi pingasunngornermi ammaanersiornermik aallartinneqassapput.  

Qajartortartut Kattuffianni siulittaasup, Johanne Tobiassenip ukioq manna pissartanngorniunnerni peqataasoqarnerussangatippaa:

- Arlalinnik ilaasortartaarnikuuvugut tamannalu qanoq angusaqarfiunissaa qilanaaraarput, taanna oqarpoq nangillunilu:

- Inuit siornatigornit amerlanerusut namminneq qaanniornikuupput, taamaattumik taakkua assartorneqarnissaannut Ilulissani Sisimiunilu containerit marluk pisariaqartinneqarput. Nalinginnaasumik ataasiinnaq pisariaqartinneqartaraluarpoq.

Ikiuuttussat ilanngukkaanni inuit katillugit 164-it peqataaniarlutik nalunaarsimasut, Johanne Tobiassen oqaluttuarpoq. Unammeqataasussat pingasunngornermi juulip aallaqqaataannit tallimanngorneq juulip qulingata tungaanut unammissutini assigiinngitsuni qulingiluani unammeqataassapput.

Nunatsinnili pissartanngorniunnermi kikkut pissartanngornissaannut taamaallaat tunngassuteqanngilaq.

Kulturitsinnik eriaginninneq pingaarutilik

Allunaariaqattaarnerit pingasunngornermi aallartissutigineqassapput, qaannamillu naatsumik parrunnerit, kinngusaqattaarnerit sapaatip akunnerata naanerani isiginnaarneqarsinnaassallutik.

Nuutoqaq unamminerni taakkunani pingasuni aallartiffiullunilu apuuttarfiussaaq.

- Pissartanngorniunneq annertussaaq, Johanne Tobiassen oqarpoq.

Taassuma inersimasut unammiffissani assigiinngitsuni pissartanngorniunneranni malinnaanissaq pissanganaraluartoq, kalaallit kulturiannik eriaginninnissamut aamma tunngassuteqarnera erseqqissarpaa. 

- Nunatsinni pissartanngorniunnerit siuaasatsinnit ilisimasanik kingornussatsinnik attassiniarneruvoq, Johanne Tobiassen oqarpoq nangillunilu:

- Kulturitsinnik eriaginninnissaq ineriartortitsinissarlu kattuffitsinni  qitiuvoq, unamminerit kulturerpulluunniit pineqaraluarpata.

Unamminermi peqataanissamut qanoq qaanniorsimanermut sunillu atisaqarnissamut piumasaqaatit sukannersuupput.

Assersuutigalugu tuilik puisip amianik erisaamit mersugaasariaqarpoq qajallu taqqai erisaamit aamma allunaasiaassallutik.

Taqqat arferup saarnganit tuttulluunniit nassuinit atortulersugaassapput. 

Pilersaarutit naapertuunnissaat naatsorsuutigineqartoq

Qajartortut qaannamik parrunnermi isorartunerusuni Nuuk kujataatigut kaajallallugu qajartussapput. Takisuumullu parruttussat Qinngutta kangerliumanerata tungaanut parrutissapput.

Aammattaaq Noorliit eqqaanni maqittarlugu parruttoqassaaq.

Sisimiuni qaannamik nunatsinni siorna pissartanngorniuttoqarmat peqataasut arlallit silarlunnera pissutigalugu peqataanngitsoorput.

Ukioq mannali pilersaarutit naapertuunnissaat naatsorsuutigineqarpoq:

- Unammiffissat tamarmik piffissaq eqqorlugu pinissaat pilersaarullu naapertorlugu ingerlanissarput naatsorsuutigaarput, Johanne Tobiassen oqarpoq. 

Pissartanngorniunnerit KNR-ikkut toqqaannartumik malinnaaffigisinnaavatit.