Air Greenland KAK-lu kalaallit arsaattartui pillugit millioninik nalilimmik suleqatigiissuteqartut
Air Greenland aamma Kalaallit Arsaattartut Kattuffiat (KAK) ukiuni pingasuni suleqatigiinnissamik isumaqatigiissuteqarput, taannalu kalaallit isikkamik arsartartunut futsalimillu arsartartunut nunanut allanut unammisartunut pitsaanerusumik atugassaqartitsilissaaq.
Isumaqatigiissut angalanissanut akikillisaassaaq, nunanut allanut unammisartut sungiusaqatigiittarnissaannut piuminarnerulersitsissaaq, nunanut allanut unamminissanut, taakkunanilu aaqqissuussanut aamma pisariillisaassalluni.
Isumaqatigiissummi nunanut allanut unammisartut salliutinneqarput, taamaalilluni KAK nammineerluni aningaasaatini nunatsinni silami arsartartut futsalertartullu peqatigiiffiisa ineriartortinnissaannut periarfissaqalissaaq.
Suleqatigiinneq ullumikkumiit aallartippoq 2029-p naanerata tungaanut atuutissaaq. Isumaqatigiissummi arsaattartut uku pineqarput; arsartoqatigiit 11-nik arsartullit, arnat angutillu inuusuttut inersimasullu nunanut allanut unammisartut, aamma futsalertartut. .
Nunatsinni arsaattarnerup pitsaanerulersinneqarnera
KAK-p siulittaasuata Kenneth Kleistip oqarnera naapertorlugu suleqatigiinnermik isumaqatigiissut kattuffiup oqaluttuarisaaneranut alloriarneruvoq.
- Air Greenlandimik suleqatigiinnissamik isumaqatigiissut timersornikkut nunatsinni ataatsimoornissamut KAK-p anguniagaanut nutaamut naleqqulluinnarpoq. Tapiissutit nunatta nunanut allanut unammisartut amerlanerusunik sungiusaqatigiittarnissaannut periarfissaqartitsilissaaq, unamminissanut aamma nunarput sinnerlugu unammisarnissaannut, siulittaasoq oqarpoq.
- Isumaqatigiissummi nunanut allanut unammisartut salliutinneqarmata, taakkununnga nutaanik periarfissaqalersitsissaaq. Klubbini siuarsaanigut nunatsinni arsartarnerup futsalillu pitsanngorsarnissaannut ineriartortinnissaannullu aningaasat atorneqarsinnaanngussapput. Isumaqatigiissutillu angusaqarusussuseqalersippaatigut nunatsinni nunanut allanut unammisinnaanissatsinnut, timersuut nunatsinni soqutigineqarnerulersinneqarsinnaassalluni, taama Kenneth Kleist oqarpoq.
Air Greenlandimut nalinginnaasuusoq
Air Greenlandimi ingerlatsinermut pisortap Jacob Nitter Sørensenip suliffeqarfiup Kalaallit Nunaanni timmisartortitseqatigiiffittut inissisimaneranut suleqatigiinnermik isumaqatigiissutip pissusissamisoornera erseqqissaatigaa.
-Kalaallit Nunaanni timmisartortitseqatigiiffittut suliassaraarput angallannikkut nunatta ataatsimoortinnissaa, Jacob Nitter Sørense taama oqarpoq.
- Suleqatigiinnissamik isumaqatigiissut tunngavigalugu nunanut allanut unammisartut pisariinnerusumik sungiusaqatigiittarnissaannut periarfissaqartitsilerpugut, KAK timersoqatigiiffinni nammineerluni arsaattartunut ineriartortitsisassalluni.
Suleqatigiinnissamut isumaqatigiissut katillugu 3 millionit koruuninik naleqarpoq.
2 millionit koruunit siulliit piffissami 2026-2028-mut immikkoortinneqarput 2029-mili 1 millionit koruuninik isumaqatigiissutip amerlineqarsinnaaneranut nunatsinni nunanut allanut 2029-mili unamminissanut unamminissanik aaqqissuussisoqarnissaa piumasaqaataavoq.
