Múte B. Egede Kuannersuit pillugu: - Nutaartaqarnavianngitsoq nalilerneqarmat itigartitsissutigineqarpoq

Australiamiut aatsitassarsioqatigiiffiat Greenland Minerals A/S Kuannersuarni aatsitassanik piiaanissamut misissueqqissaarnissamut 2007-imili akuersissuteqartoq, misissueqqissaarnissamut akuersissummik qinnuteqaqqippoq.

Qinnuteqaataalli naalakkersuisunit itigartinneqarpoq.

- Itigartitsineq tunngaveqarpoq massakkut misissueqqissaarnerit ukiorpanni ingerlanneqarsimasut tunngavigisaanik nutaamik annerusumik paasissutissanik pissarsisoqarsinnaannginnera nalilersuutaammat, Nunanut allanut, Inuussutissarsiornermut Aatsitassanullu Naalakkersuisoq Múte B. Egede oqarpoq.

Itigartitsinermut peqqutaaqataasoq alla tassaavoq Kuannersuit aatsitassanik qaqutigoortunik piiaaffiginiaraanni Uranimik aamma piiaanissap avaqqunneqarsinnaannginnera.

- Aatsitassat qaqutigoortunik taagorneqartut uranitaqarput annertujaamik massakkullu inatsiserisagut toqqammavigalugit uranitalinnik taama annertutigisunik piiaasoqarsinnaanera inerteqqutaavoq nunatsinni, Múte B. Egede oqarpoq.

Eqqartuussivimmi suliaq suli ingerlasoq

Greenland Minerals A/S-ilu aatsitassanik piiaanissamut qinnuteqaataat 2022-imi itigartinneqarpoq. Taakku tamatuma kingorna Namminersorlutik Oqartussat 80 milliardit koruuninik akiliisinniarlugit eqqartuutitinniarpaat.

- Ingerlatseqatigiiffiup ukiut siuliini nunarput eqqartuussivilersuullugu aallartereernikuuaa aammalu eqqartuussivilersuussinerit ingerlatillugit akuersissuteqarfiusut aalajangersimasut imaluunniit misissuiffigineqarsinnaasut nutaanik tunniussiffigineqarnavianngillat, taanna oqarpoq.

Ingerlatseqatigiiffik Københavnip eqqartuussivianut Nunattalu Eqqartuussisuuneqarfianut 2025-imi suliassanngortitsivoq. Københavnilli Eqqartuussiviata suliaqarnissani itigartitsissutigaa.

Eqqartuussivimmilu suliaq Nunatta Eqqartuussisuuneqarfiani suliarineqartussanngorpoq taamaammallu ingerlatseqatigiiffiup suliaq suli attakkunikku eqqartuussivimmi ukiuni aggersuni suliaqartoqarnissaa naatsorsuutigineqassasoq Múte B. Egedep oqaatigaa:

- Ingerlatseqatigiiffiup nunatsinni eqqartuussivilersuussinini suli attakkuniuk ukiuni aggersuni  ingerlatissavaa.

Kujataani innuttaasut isumaat tusaaneqartut

Kuannersuarni aatsitassanik qaqutigoortoqarnera pissutigalugu kujataani innuttaasut aatsitassarsiortoqassagaluarpat toqqissisimanatik siornatigut oqariartuutigisareerpaat.

Aatsitassanut naalakkersuisup oqarnera naapertorlugu innuttaasut isumaat aamma  Greenland Minerals A/S-ip qinnuteqaataannik itigartitsinissamut aalajangeeqataapput.

- Isummernerni soorunami inatsimmik toqqammaveqaraluarluta innuttaasut taqqavani suliamut annertuumik tassunga isummersortarnerat aamma taanna naalaarparput.

Taamaammat Múte B. Egede naapertorlugu kujataani innuttaasut uranimik imaluunniit aatsitassanik qaqutigoortunik piiaasinnaanissamut misissueqqissaarisoqarnissaanut ernumassutissaqartariaqanngillat.

- Ernumassutissaqartoqanngilaq inatsisit piusut toqqammavigalugit naalakkersuisut sulivugut nunatsinnilu uranimut inatsit toqqammavigalugu uranitalinnik akoqarpallaartunik piiasoqarnissaa inerteqqutaavoq, taanna erseqqissaavoq.

- Taamaattoqarnavianngilarlu, taanna oqarpoq.