Parnaarussivimmi angutit arnallu ataatsimoortinneqartarnerat maanna allanngortinneqartoq

Folketingip ombudsmandia Christian Britten Lundblad Nuummi parnaarussivimmut misissuiartorluni siorna tikeraarpoq.  

Misissuiartornerminilu, angutit arnallu parnaarussat ataatsimoortinneqartarsimanerat paasivaa.  

Tamanna parnaarussanut qanoq kinguneqarsimaneranik tunngatillugu misissuisoqarnissaanik piumasaqarsimavoq. 

- Suliamut tunngatillugu saaffiginnissuteqareernikkut, Kalaallit Nunaanni Parnaarussiveqarfiit aaqqissuussaq allanngortinniarlugu aalajangerput. Taamaalilluni Nuummi parnaarussivimmi matoqqasumi immikkoortortaqarfik ataaseq juunip sisamaat 2026 aallarnerfigalugu, arnanut taamaallaat atorneqarsinnaanngorpoq, Christian Britten Lundblad saqqummiussamini allappoq.

Arnat angutillu A4-mi inissinneqarsimanerat ima kinguneqarpoq, tassa isumannaallisaaneq eqqarsaatigalugu, arnat angutillu sivikinnermik inini ataatsimoorfinniisinneqartarput.

- Parnaarussat allanik peqateqarnissaat ininilu ataatsimoorfiusartuniittarnerat atugaannut ulluinnaannullu pingaaruteqangaatsiarpoq, Christian Britten Lundblad tusagassiuutinut nalunaarummi allappoq:

-Arnat Nuummi parnaarussivimmiittut immikkoortinneqalernerat pitsannguutaasullu ataatsimoornermut periarfissaqarnerulersitsimmata naammagisimaarpakka.  

Ineeqqanut allanut pulaarsinnaatitaanerit

Kalaallit Nunaanni Parnaarussiveqarfiisa, arnat angutillu immikkoortortami A4-mi ataatsimoortinneqarnerat, parnaarussivimmi ineeqqanik inoqanngitsoqalersinnaanera suiaassutsillu tunngavigalugit parnaarussassanik allanik tigusisoqarsinnaajunnaarsinnaanera peqqutaasoq Folketingip ombudsmandianut paasissutissiissutigaat. 

Immikkoortortami parnaarussat, tassa arnat angutillu akunnerit marlukkaarlugit inini ataatsimoorfiusuniissinnaanerannik kinguneqarpoq. 

Kalaallit Nunaanni Parnaarussiveqarfiit nalunaarusiaanni, parnaarussat ininut ataatsimoorfiusunukarnatik taarsiullugu ineeqqanut allanut pulaarsinnaapput, Folketingip ombudsmandia allappoq:

-A4-mi parnaarussat inini ataatsimoortarfiusumukarsinnaanngikkaangamik ineeqqanut allanut pulaarsinnaasarput, parnaarussatulli allatut aamma susassaqartinneqartarlutik. 

Tusagassiuutinut nalunaarummi allassimasoq naapertorlugu, arnat immikkoortinneqarlutik inissinneqarmata, parnaarussat nalunaaqutaq ullaakkut arfineq-pingasuniit unnukkut qulingiluat tungaannut inini ataatsimoorfiusumiissinnaanngorput.