Angut uninngaqatiminik toqutsereernerata kingorna inissitassanngortinneqarluni eqqartuunneqartoq

Angut kalaaleq 47-nik ukiulik Slagelsemi inissiisarfimmut isumannaallisaalluinnarfiusumut inissinneqartussanngorluni Aarhusimi eqqartuussivimmit eqqartuunneqarpoq.

Angutip Aarhus Universitetshospitalimi tarnikkut nappaatillit pinerluuteqarsimasut immikkoortortaani uninngaqatiminik 41-nik ukiulimmik toqutsisimasutut nassuernerata kingorna tamanna pivoq.  

Pinerliisoq pinerlineqartorlu napparsimmavimmi marluullutik martsimi 2024-mi uninnganeranni tamanna pivoq.

Angutip ingiaqateqarnani aneqqusaanermini Føtex-imi igasup savianik pisisimavoq, taannalu atorlugu angut 41-nik ukiulik kapisimavaa.

Pinerlineqartup arlaleriarluni ajoqusersorsimaginni, angut eqqartuussivimmi ataasinngornermi ualikkut nassuiaavoq.

- Ukiuni sisamani Skejbymiinnerma ingerlanerani toqunniarlunga arlaleriarluni sioorasaarsimavaanga. Kamassaartarpaanga, mitaatigisarpaanga, ajoqusersorlunga malersortarlungalu, taama oqarpoq.

 Imminut nassuiaatigisoq

Angut taartunik naatsunik nujalik tungujortumik tujuuloqarpoq. Politiinit marlunnit ungasianiit nakkutigineqarpoq.

47-nik ukiulik skizofreni nappaatigigaa, nunatsinnilu  toqutsisimasutut toqutseriaraluarsimasullu 2021-mi katsorsagassatut eqqartuunneqarsimasoq, eqqartuussinermi paasinarsivoq.

Skejbymi tarnikkut napparsimasunut pinerluuteqarsimasunut immikkoortortaq, angutip uninngaffigisimasaa, kalaallinik uninngasunik sullissisuuvoq. 

Tarnikkut napparsimasut pinerluuteqarsimasut pinerluuteqarsimasutulluunniit pasillerneqarsimasut tassani pineqarput.

Immikkoortortami sulisut angummut tusarnaarsimasugunik toqutsineq pinngitsoortinneqarsimasinnaagaluartoq, angut 47-nik ukiulik isumaqarpoq.

Toqutsinissani aqaguttoq „ajortumik kinguneqarsinnaaneranik“ sulisunut mianersoqqusisimalluni, angut eqqartuussivimmi oqarpoq.

- Kisianni tusarnaarneqanngilanga, taanna oqarpoq.

Isumannaallisaanikkut sukaterisoqartoq

Toqutaasimasup pania eqqartuussinermi Nuummi eqqartuussivimmi videokkut attaveqaatitigut peqataavoq.

Angumminik annaasaqarsimanini oqaluttuaraa, naallu pisoq alianaraluartoq suliap ajunngitsumik nassataqarnissaa neriuutigaa:

- Neriuppunga tarnikkut napparsimasunut immikkoortortami isumannaallisaanikkut sukaterisoqassasoq. Isumannaallisaaneq pitsaanerusimasuuppat, ataataga suli maaniissimasinnaagaluarpoq, arnaq inuusuttoq qiasunngulluni oqarpoq.

Pisimasoq pissutigalugu tarnikkut napparsimasut immikkoortortaqarfiini isumannaallisaanerit sukaterneqarsimasut, Jyllandip qeqqani tarnikkut nappaatillit immikkoortortaqarfianit siusinnerusukkut ilisimatitsissutigineqarpoq.

Napparsimasut assersuutigalugu savimmik eqqussuinissaat pinngitsoortinniarlugu maanna saviminernut detektorit atorneqalersimapput.

Aammattaaq qaammatit tamaasa inulerisut arlallit ataatsimeersuartarput, tassanilu napparsimasut ataasiakkaat anisinnaatitaanersut inulerisut aalajangiisarput.

Tamanna nunap immikkoortuani napparsimmaveqarfimmit Ritzauimut allakkatigut oqaaseqaammi ilisimatitsissutaavoq.

Slagelsemi isumannaallisaanermut immikkoortortaqarfik isumannaallisaanermik qaffasissumik ingerlatsinerminik ilisimaneqarpoq.

Tassani tarnikkut napparsimasut ulorianarnerpaat nunamit tamarmeersut uninngatinneqartarput. Eqqartuussut akuerineqartoq, angutip eqqartuussissuserisuanit oqaatigineqarpoq.

/ritzau/