Nivi Olsen naalakkersuisutut tunuarpoq

Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu naalakkersuisutut tunuarpoq.
Assi © : KNR
novembarip 10-at 2026 09:52

Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu naalakkersuisutut tunuarpoq.

Facebookimi quppernermini taama ilisimatitsivoq.

Tunuarnerminut suna pissutaanersoq tunngavilersunngilaa.

Naalakkersuisuusimaninilu nuannaarutigalugu allappaa.

- Piffissaq sivikikkaluaq tamaasa malunnaatilinnik ukiunik amerlasuuni nikisikkusutannik nikisitsiffingaakka malunniutilerumaartussanik, Nivi Olsen allappoq.

Taanna Inatsisartuni sapaatip akunnerani kingullermi tatiginnikkunnaarnermik nalunaaruteqartoqarmat marloriarluni aniguivoq.

Nivi Olsenip pasilliutigineqartut tallimanngormat itigartitsissutigai, taannami kukkusumik iliuuseqarsimanani isumaqarpoq.

Tamatuma kinguninngua Atassut naalakkersuisoqatigiinnit aniniarluni ataasinngornermi unnukkut nalunaaruteqarpoq.

Tassani Nivi Olsenip tunuartariaqarneranik piumasaqaateqarnertik naalakkersuisoqatigiinnit tusarneqarsimannginnera tunngavilersuutigaat.

Politikkikkut ulluni kingullerni pisoqarnerata kingorna Nivi Olsen tunuartoq, Naalakkersuisut tusagassiuutinut nalunaarummi allapput.

- Nivi Olsenip akisussaaffigisai Avatangiisinut, Pinngortitamut, Nukissiutinut Ilisimatusarnermullu Naalakkersuisup Jørgen Rosbachip tigussavai, nalunaarummi allaqqavoq.

Aammattaaq Maritha Brobergip (A) Isumaginninnermut, Suliffeqarnermut, Ilaqutariinnut Nunamullu Namminermut naalakkersuisuuffigisimasai, Aqqaluaq B. Egedemit (IA) akisussaaffigineqalertut, allapput.

Naalakkersuisoqatigiit Demokraatit Inuit Ataqatigiillu ingerlaqqissasut, Jens-Frederik Nielsen Inatsisartuni oqaluttarfimmit oqarpoq.

- Akisussaaffik angisoorujussuaq suli inuiaqatigiinnut paarivarput. Piffissaavoq tassani ataatsimoorfeqarnissarput taannalu soorunami nangissuarput pisussaaffipput, naalakkersuisut siulittaasuat oqaluttarfimmi taama oqarpoq.

Taassuma naalakkersuisuujunnaartut aamma qutsavigai.

- Pinngitsoorusunngilanga naalakkersuisutut tunuartut Qamannga pisumik qutsavigerusullugit suliamut annertuumut kivinnikuusaannut, Jens-Frederik Nielsen oqarpoq.

Kim Kielsen (Attaviitsoq), Jens-Frederik Nielsen (D), Múte B. Egede (IA) aamma Pele Broberg (N) ataatsimiititaliap siunissai pillugit eqqartueqatigiipput.  Assi © : Nauja Møller / KNR

Nalerarlu sisamanngormat tatiginnikkunnaarnermik taaseqataagaluarlutik, Nivi Olsenip naalakkersuisuusimaneranut qutsavigaat

- Politikkikkut imaannanngitsumik killiffeqarpugut, aalajangerneq naalakkersuinikkut killiffeqarnermi ataqqinartumik aaqqinneqarnerani nersualaarinnikkusuppugut. Kukkunersiuinermi ataatsimiitsitaliap nalunaarusiaata imaa imaannaanngitsorujussuaq killiffigivarput. Kisianni Nivi Olsenip naalakkersuisuusimanerani angusarpassui aamma assigiinngitsut pillugit qutsavigaarput, Jens Napãtôk' oqarpoq.

Naleraq, Siumut Atassullu suleqatigiinnissamik isumaqatigiissuteqalerlutik taassuma aamma oqaatigaa.

- Atassut suleqatigisinnaallugu neqeroorfigisimavarput, Jens Napãtôk' oqarpoq nangillunilu:

- Taakku ullaaq nalunaarput taamaaliorusullutik taamaalilluta teknikkikkut suleqatigilerneranni Siumut Atassut Nalerarlu aqqaneq marluutitaqalernitsinni ataatsimiititaliami inissinnissamut tamanut sunniuteqartussanngorpoq.

Atassutip naalakkersuisoqatigiinnit aniniarluni sioorasaaruteqarneraniilli Nivi Olsenip siusinnerusukkut sooq tunuarsimannginnera Aqqalu C. Jerimiassenip paasisinnaannginnerarpaa.

Taanna KNR-imut oqarpoq.

- Uggornarpoq piffissaatillugu qisuariarsimanngimmata. Sooq utaqqeqqaarsimanerpaatigut taanna taamannak killiffeqarneq assannik isaassivigereernikuugaluarpagut taamaaliumanikuunngillat maannakkut aattaat taamannak qisuariaqarput, Aqqalu C. Jerimiassen oqarpoq.

- Taanna uggornartutut nalilerparput taamaalilluni suleqataasimasinnaagaluarnerput sapangitseriarlugu kingusinaarlutik iliuuseqarput.

Nivi Olsen: Sakkortuvoq

Nivi Olsenip naalakkersuisutut tunuarnini sakkortusoq KNR-imit apersorneqarnermini oqaatigaa.

- Sakkortuvoq kisianni tassa politikki taamaappoq, uummateqarfigisaq suliffiginikuullugu, taanna oqarpoq nangillunilu:

- Naatsumik oqaatigalugu: Politikki nuannersuuvoq, kisianni aamma kusanaaffissamini kusanaassisarpoq. Tamaasa atugassat politikkip iluaniipput. 

Taassuma KNQK-mut aningaasaliissutit, tassunga sisamanngormat tatiginnikkunnaarnissamik sapaatip akunnerata siuliani siunnersuuteqarnermut pissutaasut misissoqqissaarneqarnissaat aamma neriuutigaa.

- Taamaammat uani pisumi suliffimmi nuannarisami aamma naqissuserlugu oqallinnerujorujussuaq ilaatigut neriunartoq aamma iternga tikillugu paasineqassasoq paasiniarneqarlunilu inatsimmik unioqqutitsinertut immaqa oqariartorfigineqarneq taanna sammineqarluassasoq, Nivi Olsen oqarpoq, nangillunilu:

- Peqqutigalugu massakkumut tassa uanninngaanneerpoq una. Inatsisit tamaasa eqqorlugit Avannaata Qimussersuanik annaassineq akeqarpoq. 

Assi © : KNR

Maanna naalakkersuisuusimasup peqqissimissutissaqarnani sulianilu tulluusimaarutigalugit aamma oqaatigaa:

- Kisianni peqqissimissutiginngisaannassavara aalajangersimanikka, aamma peqqissimissutiginngisaannassavara nunatsinni kulturi pingaartitatta ingerlaannarnissaa qulakkeersimagakku, taanna oqarpoq:

- Tanngassimaarlunga imminullu pattalaarlunga suliaq imaannaanngitsoq kivissimallugu anissaanga.

Inatsisartuni Nivi Olsenimut tatiginnikkunnaarnissamik sisamanngormat nalunaaruteqartoqarmat tunuarniarnani oqarpoq. Nivi Olsenilli inissisimaffianik allannguineq Atassutip naalakkersuisoqataajunnaarneranik sunnerneqarpoq: 

- Nipilersoqataapput sallussaanga oqaruma nipilersoqataanngitsut, soorunamili nipilersoqataapput, taanna oqarpoq, nangillunilu:

- Uannut pingaarnerpaarpaajuaannarpoq inuiaqatigiit sullinneqarnerat aamma taamaattuassaaq inuk salliunngisaannassaaq inuiaqatigiit sullinneqarnerannut.